Depýtattar 1984 jyly salynǵan emhananyń jumysymen de tanysty. Dárigerler ujymymen kezdesýde aýylda dáriger mamandardyń azdyǵy, atap aıtqanda akýsher-gınekolog pen hırýrg mamandarynyń jetispeıtindigi jáne «Jedel járdem» kólikteriniń eskirgendigi aıtyldy.
Senatorlar máselelerdiń sheshimi tabylatynyn jáne oblys basshylyǵymen birlesip «Jedel járdem» kólikterin jańalaýdy qolǵa alatyndaryn atap ótti. Sondaı-aq emhana «Aýyl – el besigi» baǵdarlamasy boıynsha kúrdeli jóndeýden ótetin nysandar tizimine engizilgenin, sondyqtan dáriger tapshylyǵyn joıý máselesine aıryqsha nazar aýdarý kerek ekeni aıtyldy.
Depýtattar sonymen qatar aýyldaǵy ataqty Tamshybulaqty kóriktendirý josparymen, tarıhı jádiger – Shaıahmet baı úıine júrgizilgen restavrasııalyq jumystarmen tanysty. Osy úıde Qapaldyń ólketaný mýzeıin uıymdastyrý jospary týraly aıtyldy. Senatorlar bul baǵytta qoldaý kórsetiletinin atap ótti.
«Qapal – qundy tarıhı jádigerler kóp saqtalǵan jer. Sondyqtan, bul mekende bolashaqta týrızmdi damytýǵa, ony tól tarıhymyzdy tanytatyn eldi mekenderdiń birine aınaldyrýǵa kúsh salýymyz qajet», dedi Baqytjan Jumaǵulov.
Depýtattar Ǵalı Ormanov mektebindegi oqýshylardyń jazǵy lagerinde de boldy. Onda Baqytjan Jumaǵulov bilim salasyna qatysty qabyldanǵan zańdar týraly, memleket tarapynan ustazdar men oqýshylarǵa jasalyp jatqan jaǵdaılar týraly aıtty.
Sapar barysynda senatorlar halyqpen kezdesip, olardyń máselelerin tyńdady. Atalǵan kezdesýde Qapal aýylyndaǵy jer qatynastaryn retteý, jaıylymmen qamtamasyz etý, veterınarlyq pýnkt ashý, aýyldy abattandyrý jáne joldardy jóndeý máseleleri kóterildi. Bul máselelerdiń barlyǵy senatorlarlardyń baqylaýyna alyndy.
«Memlekettik basqarýdyń ashyqtyǵyna, azamattardyń ótinishteri men shaǵymdaryn sheshýde eleýli nátıjege qol jetkizýde bılik pen qoǵam arasyndaǵy senimdi dıalog ornatý, bıliktiń halyqqa barynsha jaqyn bolýy asa mańyzdy», dedi senator Lázzat Súleımen.
