Almatyda Medeý men Shymbulaqqa qydyrý qaıtadan sánge aınala bastady
Bul kúnderi ońtústik astananyń eń kórikti mekeni – Ile Alataýyn bókterlep jatqan Medeý shatqalyndaǵy «Medeý» muz aıdynynda konkımen syrǵanaý, Shymbulaq taý-shańǵy kesheninde qydyrý qaıtadan buqaralyq sıpat alyp keledi. Demalys kúnderi taý jaqqa qaraı aǵylyp bara jatqan almatylyqtar men qala qonaqtarynyń sany arta túskeni qýantady.
Almatyda Medeý men Shymbulaqqa qydyrý qaıtadan sánge aınala bastady
Bul kúnderi ońtústik astananyń eń kórikti mekeni – Ile Alataýyn bókterlep jatqan Medeý shatqalyndaǵy «Medeý» muz aıdynynda konkımen syrǵanaý, Shymbulaq taý-shańǵy kesheninde qydyrý qaıtadan buqaralyq sıpat alyp keledi. Demalys kúnderi taý jaqqa qaraı aǵylyp bara jatqan almatylyqtar men qala qonaqtarynyń sany arta túskeni qýantady.
Egemendiktiń eleń-alańynda eseńgiregen el Almatynyń ózinde turyp, Alataýdyń tórindegi álemdegi eń kórikti jerge qydyrýǵa murshalary da joq edi. Endi, mine, eńsesi tiktelgen halyq aýasy saf taza, qaraǵaı, samyrsyn, shyrshalary kók tiregen demalys ornyn qaıta dýmanǵa bólep otyr.
Eń bastysy, sońǵy jyldary Shymbulaqtaǵy taý shańǵysy keshenine arnaıy keletin sheteldikterdiń de qarasy kóbeıe bastady. Alys-jaqyn memleketterden kelgen týrıster qazir Medeý men Shymbulaqta kórsetiletin qyzmetke min taǵa almaıdy.
2011 jyly VII Qysqy Azııa oıyndary qarsańynda Medeý muz aıdyny men Shymbulaq taý-shańǵy kesheni kúrdeli jóndeýden ótkizilip, halyqaralyq standarttar talabyna saı kelbetke keltirilip, Medeý men Shymbulaq arasyna eń zamanaýı aspaly joldar tartylǵan edi. Osylaısha, 1972 jyly qalalyqtardyń ıgiligine berilgen, Keńes ókimeti tusynda-aq «Rekordtar fabrıkasy» atanǵan Muz aıdyny araǵa qyryq jyl salyp baryp, qulpyryp shyǵa kelgen-di.
Qazir Medeýden Shymbulaqqa aspaly jolmen baratyn adamdar panoramalyq kabınalardyń ishinde otyryp, jyldyń kez kelgen mezgilinde tóbesin muz basqan quzar shyńdardy, Ile Alataýynyń sulýlyǵyn tamashalaı alady. Kóktemde tómenge kóz salsań, neshe túrli shópter men gúlderden kóz tunady. Al qysta appaq qardan ton kıgen buıra-buıra shatqaldar men shyrshalar ertegideı álemge jeteleıdi. Bul kezde qalada jańbyr jaýyp, tuman basyp, el tútinge tunshyǵyp otyrǵanda, Shymbulaq jaqta kún shaıdaı ashyq bolyp turady.
Osylaısha, táýelsizdik tusynda ekinshi tynysy ashylǵan demalys oryndary almatylyqtarǵa shyn máninde qaıta qushaǵyn aıqara ashty. Al demalys jáne mereke kúnderi bul jaqqa avtobýs túngi 24.00-ge deıin qatynaıdy. Qazirgi qala jastary arasynda Medeýdegi «túngi syrǵanaýǵa» barý sánge aınalyp keledi.
Aınash ESALI,
«Egemen Qazaqstan».
ALMATY.
Sýretterdi túsirgender Erlan OMAROV, Iýrıı BEKKER.
