Keshe Ortalyq kommýnıkasııalar qyzmetinde Eýrazııalyq bıznes-forýmǵa jáne kásipkerliktiń damýyna arnalǵan baspasóz máslıhaty boldy. Onda sharany uıymdastyrý komıtetiniń tóraǵasy Qýanysh Dáýitov atalǵan forým 17-18 sáýirde Almaty qalasynda ótetindigin málimdedi.
Keshe Ortalyq kommýnıkasııalar qyzmetinde Eýrazııalyq bıznes-forýmǵa jáne kásipkerliktiń damýyna arnalǵan baspasóz máslıhaty boldy. Onda sharany uıymdastyrý komıtetiniń tóraǵasy Qýanysh Dáýitov atalǵan forým 17-18 sáýirde Almaty qalasynda ótetindigin málimdedi.
Brıfıngke Májilis depýtaty jáne «Nur Otan» partııasynyń kásipkerlikti damytý máseleleri jónindegi úılestirýshisi A.Soloveva, Qazaqstannyń ulttyq kásipkerler palatasy basqarma tóraǵasynyń orynbasary R.Oshaqbaev, «Ǵalymdardyń Eýrazııalyq ekonomıkalyq klýby» qaýymdastyǵynyń vıse-prezıdenti M.Kýrbenov jáne Eýrazııalyq bıznes-forýmnyń uıymdastyrý komıtetiniń tóraǵasy Q.Dáýitov qatysty.
Qazaqstanda 1,5 mıllıon shaǵyn jáne orta kásipkerlik sýbektileri tirkelgen. Qazirgi tańda onyń 850 myńy belsendi jumys istep tur. Halqymyzdyń belgili bóligi, atap aıtqanda, eńbekke qabiletti 2 mıllıonnan astam azamat osy salada qyzmet etedi, dedi ortalyq kommýnıkasııalar qyzmetiniń resmı ókili A.Ábıbýllaev kirispe sózinde. Sóıtip, memlekettik saıasat pen ulttyq básekege qabilettilikti nyǵaıtýda kásipkerliktiń róli ósip kele jatqanyn aıtty. Demek, kásipkerlikti qoldaý – kún tártibinde.
– Partııa óziniń saılaýaldy tuǵyrnamasynda shaǵyn jáne orta bıznesti damytý boıynsha naqty mindetter aldy. Partııada kýratorlyq ınstıtýty quryldy. Bul birneshe baǵytty qarastyratyn jańa ınstıtýt. Tuǵyrnama mindetterin biz ındıkatorlar júıesi arqyly baǵalaıtyn bolamyz. Atap aıtqanda, osyndaı ındıkatorlardyń 3 deńgeıin belgiledik. Olardyń bireýi jahandyq sıpatqa ıe. Bul álemdik qaýymdastyqta jáne ulttyq deńgeıde qabyldanǵan ólshem – ishki jalpy ónimniń qurylymynda shaǵyn jáne orta bıznes úlesiniń qandaı bolatyndyǵy. Ol ındıkator, bıznes óziniń laıyqty ornyn alýy úshin oǵan qandaı jaǵdaı jasaǵanymyzdyń kórsetkishi ispetti. Ekinshi, aǵymdaǵy ındıkatorlar. Bizdiń elimizde qazir qoldanylyp júrgen baǵdarlamalardy túzetip, jańa usynystar engizýge múmkindik beredi. Úshinshi, kiriktirilgen ındıkator. Ol arqyly bıznestiń qanshalyqty belsendi damyp jatqanyn bilýge bolady, – dedi depýtat A.Soloveva.
Baspasóz máslıhaty barysynda «Ǵalymdardyń Eýrazııalyq ekonomıkalyq klýby» qaýymdastyǵynyń vıse-prezıdenti M.Kýrbenov pen Eýrazııalyq bıznes-forýmnyń uıymdastyrý komıtetiniń tóraǵasy Q.Dáýitov ózara kelisim memorandýmyna qol qoıdy. Odan keıin taraptar eki uıymnyń birlese otyryp atqaratyn jumystary týraly aıtty. Eldegi shaǵyn jáne orta kásipkerlikti damytý máselelerine toqtaldy.
– Eýrazııalyq bıznes-forýmǵa daıyndyq jumystary bes aıdan beri júrgizilýde. Búginde Qazaqstandaǵy bıznes Eýrazııalyq ekonomıkalyq odaqqa kirýdiń barlyq múmkindikterin tolyq baǵalap úlgergen joq. Sondyqtan, forýmda osy jáne ózge de máselelerdi talqylap, kásipkerlerge paıdasy bolatyn túrli sharalardy qarastyrý josparlanyp otyr. Qazaqstannyń jáne Keden odaǵy elderiniń basshylaryna shaqyrtý hatyn joldadyq, – dedi Q.Dáýitov.
Atalǵan bıznes forým 17-18 sáýirde Almaty qalasynda ótedi. Sebebi, elimizdegi kásipkerlerdiń basym bóligi osy qalada shoǵyrlanǵan, deıdi uıymdastyrýshylar. Osy jıynda qaralǵan máseleler mamyr aıynda ótetin Astana ekonomıkalyq forýmy aıasynda jalǵasyn tabady.
Nurbaı ELMURATOV,
«Egemen Qazaqstan».
