Ernat Júnisovtyń aıtýynsha, kolledjge túsýshiler úshin qabyldaý emtıhandary alynyp tastaldy. Tek pedagogıka, medısına jáne óner mamandyqtaryna ǵana qabyldaý emtıhandary ótkiziledi. О́ıtkeni, medısına mamandyǵy boıynsha talapkerler psıhometrııalyq test tapsyrýy kerek. Al pedagogıkalyq mamandyq boıynsha áńgimelesý túrindegi test ótkiziledi.
«Buryn talapkerlerimiz bir ǵana mamandyqqa tapsyratyn bolsa, endi 4 mamandyq tańdaýǵa múmkindik alyp otyr. Bul talapkerlerimiz úshin jasalǵan úlken múmkindik dep oılaımyn. Emtıhan alynyp tastalǵandyqtan árbir mamandyq boıynsha beıindi jáne mindetti pánderdi anyqtadyq. Mysaly konkýrs aqparattyq júıe mamandyǵyna qatysty bolsa, onda talapker úshin eki pán mindetti bolady. Biri – algebra, ekinshisi – ınformatıka. Osy eki pánniń baǵasy men qazaq tobyna tasyratyn bolsa qazaq tiliniń baly eseptelinedi. Osy úsh pánniń ortaq baly shyǵarylady jáne ol konkýrs baly sanalady», dedi Ernat Júnisov.
Dırektor orynbasarynyń aıtýynsha, osy ýaqytqa deıin kolledjge túsýshiler úshin 6 kvota qarastyrylǵan. Endi oǵan taǵy 3 kvota qosylyp otyr. Atap aıtqanda, kópbalaly otbasydan shyqqan balalarǵa 5 paıyz, tolyq emes otbasydan shyqqan balalarǵa 1 paıyz jáne múgedek bala tárbıelep otyrǵan otbasylar úshin 1 paıyz kvota beriledi.
«Qazirgi ýaqytta 129 myńǵa tarta talapker kolledjderge qujattaryn tapsyrdy. 29 shilde men 3 tamyz aralyǵynda óner mamandyqtary boıynsha konkýrs ótip, nátıjesi shyǵaryldy. 3 700-den astam talapker qujat tapsyryp, 2 800 oqýǵa tústi. Sebebi, memlekettik tapsyrys tek 2 800 adamǵa bólingen. Kelesi konkýrs medısına men pedagogıka mamandyqtary boıynsha tamyzdyń 18-21 aralyǵynda ótkiziledi. Nátıjesin 22-23 tamyz kúnderi jarııalaımyz. Kolledjge túskenderge kóptegen áleýmettik jeńildik qarastyrylǵan. Jumysshy mamandyǵyna túsken talapkerler bir mezgil ystyq tamaqpen qamtamasyz etilip, 21 787 teńge kóleminde shákirtaqy alady. Al jataqhanada oryn eń aldymen az qamtylǵan otbasydan shyqqan jáne 1-kýrsqa túsken balalarǵa birinshi kezekte beriledi. Búginde 438 jataqhanada 60 myńnan astam oryn bar», dedi Ernat Júnisov.
