Memleket basshysy Qasym-Jomart Toqaevtyń Jarlyǵymen dzıýdo sportynyń ókili Eldos Smetov III dárejeli «Barys» ordenimen, aýyr atlet Zýlfııa Chınshanlo II dárejeli «Dostyq» ordenimen, boksshylar Qamshybek Qonqabaev pen Sáken Bıbosynov, aýyr atlet Igor Son, taekvondoshylar Sofıa Berýlseva men Darhan Asadilov jáne erkin kúres sheberi Nurıslam Sanaev «Qurmet» ordenimen marapattaldy.
Memlekettik nagradamen qatar, sportshylar men olardyń jattyqtyrýshylaryna qarjylaı syıaqy tapsyryldy. Atap aıtqanda, Olımpıada júldegerlerine 31 mln teńge, al jattyqtyrýshylaryna 25 mln teńge kóleminde syıaqy sertıfıkaty berildi. Saltanatty is-sharaǵa barlyq júldeger men bapkerlerden bólek, Premer-Mınıstrdiń orynbasary Eraly Toǵjanov, Prezıdent Ákimshiligi Basshysynyń birinshi orynbasary Dáýren Abaev qatysty.
Jıynda Memlekettik hatshy Tokıo Olımpıadasy elimizdegi sport salasynyń shynaıy bet-beınesin anyq kórsetkenin atap ótip, sport salasyna shuǵyl reforma qajet ekenin aıtty. Birde-bir sportshymyzdyń altyn ne kúmis júldege qol jetkize almaýy eldigimizge syn bolǵanyna toqtaldy.
– Eń áýeli, balalar men jasóspirimderdiń dene shynyqtyrýmen, sportpen aınalysýyn qamtamasyz etý qajet. О́skeleń urpaqtyń sportpen shuǵyldanýyna jaǵdaı jasamaı, iri jarystarda jetistikke jetemiz deý ábestik. Sondyqtan elimizdiń barlyq aımaqtaryndaǵy sport mektepteri men úıirmelerdiń jaǵdaıyna tereń taldaý jasalyp, olardy qoldaýdyń keshendi jospary ázirlenýi tıis. Halyqtyń salamatty ómir saltyn ustanyp, buqaralyq sportpen aınalysýyn damytqan durys. Sportpen shuǵyldanatyn halyqtyń sanyn arttyrsaq, odan sapa shyǵady. Bul da kezek kúttirmeı, jedel qolǵa alatyn sharýanyń negizgisi, – dedi Qyrymbek Eleýuly.
Saltanatty is-shara sońynda Qazaqstan ulttyq quramasynyń atynan Eldos Smetov pen Sofıa Berýlseva sóz sóılep, pandemııaǵa qaramastan, tyńǵylyqty jattyǵý jumysyn júrgizýge bar jaǵdaıdy jasaǵany úshin Memleket basshysyna alǵys aıtty.
