Bızlıdiń sózine qaraǵanda, birneshe jyl qatarynan bolǵan qýańshylyq, konflıkt pen koronıvırýs indeti jáne ekonomıkadaǵy daǵdarystan keıin Aýǵanstandy «aýyr apat» kútip tur. Gýmanıtarlyq apattyń aldyn alý úshin Birikken ulttar uıymyna qyrkúıekke qaraı kemi 200 mıllıon dollar kerek. Oǵan deıin halyqtyń azyq-túligi taýsylyp, gýmanıtarlyq kómekke muqtaj aýǵandar eki ese kóbeıedi.
BUU Aýǵanstanǵa qajetti kómekti AQSh, Katar jáne Parsy shyǵanaǵy elderi bóle me dep úmittenedi. Tálipter BUU kómegi muqtaj adamdardyń qolyna jetetinine kepildik berip otyr deıdi Bızlı.
Sarapshylardyń baǵalaýynsha, Aýǵanstanda 36 mıllıon adam ómir súredi.
2020 jyldyń qarashasynda shetel tórt jyl ishinde Aýǵanstanǵa 12 mıllıard dollar gýmanıtarlyq kómek berýdi uıǵarǵan edi. Biraq kóp memleket bul kómektiń Aýǵanstan bıligi adam quqyǵyn qalaı qorǵaǵanyna qaraı beretinin alǵa tartqan.
BUU tálipter bılikke kelgen soń adam quqyǵyn buzyp jatqanyn senimdi derekkózderden bilip otyrǵanyn habarlaǵan. Bul habarǵa qaraǵanda, Aýǵanstannyń burynǵy bıliginiń qaýipsizdik kúshterinde qyzmet etkender men qarapaıym aýǵan azamattarynyń óltirilgeni jaıly málimetter bar. «Talıban» mundaı qatygezdik týraly kez kelgen habardy zerttep, kinálini jaýapqa tartatynyn málimdegen.
Sharıǵat zańyn ustanatyn «Talıban» qozǵalysy 15 tamyzda Kabýldy alǵan soń Aýǵanstanǵa tolyq baqylaý ornatqanyn jarııalaǵan. Sonan beri áıelder men qyzdarǵa kóbirek quqyq beretinine, zorlyq-zombylyq kórsetpeıtinine, sóz erkindigine de aıryqsha tyıym salmaıtynyna halyqaralyq qaýymdystyqty sendirýge tyrysyp keledi.
