Mysaly, jaqynda Aqsý aýdanynyń polısııa bólimine 55 jastaǵy Eginsý aýylynyń turǵyny quny 300 myń teńge turatyn 5 bas usaq malyn belgisiz bireýlerdiń urlap ketkendigi týraly aryzdanǵan. Jedel ýákilder júrgizgen izdestirý sharalary barysynda sol aýyldyń 50 jastaǵy turǵyny qylmysty jasady degen kúdikke ilingen. Tergeý barysynda ury kinásin moıyndaǵan.
– Atalǵan derek boıynsha Qylmystyq kodekstiń 188-1-babyna sáıkes sotqa deıingi tergeý amaldary júrgizilýde. Bultartpas aıǵaqtardan keıin kúdikti qylmysyn tolyǵymen moıyndady. Kúdiktiniń osyǵan uqsas ózge de qylmystarǵa qatysy bary tekserilýde, – deıdi Aqsý aýdandyq polısııa basqarmasynyń basshysy, polısııa podpolkovnıgi Dáýren Sakenov.
Sondaı-aq Alakól aýdany polısııa basqarmasynyń kezekshi bólimine Qabanbaı batyr aýylynyń turǵyny bir bas usaq malyn jaıylymnan belgisiz bireýlerdiń urlap ketkendigi týraly jazbasha aryz túsirgen eken.
– Jedel-izdestirý sharalaryn júrgizip, sonyń nátıjesinde atalǵan qylmysty jasady degen kúdikpen jábirlenýshiniń 40 jastaǵy aýyldasy anyqtalyp, ustaldy. Atalǵan derek boıynsha Qylmystyq kodekstiń 188-1-babyna sáıkes sotqa deıingi tergeý amaldary júrgizilýde. Kúdiktiniń osyǵan uqsas ózge de qylmystarǵa qatystylyǵy tekserilýde, – deıdi Alakól aýdanynyń bas polıseıi, podpolkovnık Qýat Ospanov.
Aıtpaqshy, jyl basynan beri Jambyl aýdanynda da mal urlyǵy boıynsha 49 derek tirkelgen eken. Júrgizilgen jedel-izdestirý is-sharalarynyń nátıjesinde urlanǵan 243 bas maldyń 43 basy zańdy ıelerine qaıtarylǵan. Al mal urlyǵyna qatysty buryn jasalǵan taǵy 9 qylmys ashylypty.
