– О́ńirdegi kadr tapshylyǵyn sheshý úshin oblystyq bıýdjet esebinen densaýlyq, bilim, aýyl sharýashylyǵy jáne basqa da mańyzdy salalar boıynsha bilim berý granttary bólinip otyr. Bıyl konkýrsqa qatysýǵa 186 talapker ótinish berdi. Endi 52 túlek M.Ospanov atyndaǵy Batys Qazaqstan memlekettik medısınalyq ýnıversıtetinde, ekeýi L.Gýmılev atyndaǵy Eýrazııa ulttyq ýnıversıtetinde bilim alady. Al segiz óren «Nur-Múbarak» ýnıversıtetine, 86 jas H.Dosmuhamedov atyndaǵy Atyraý ýnıversıtetine oqýǵa tústi. M.О́temisov atyndaǵy Batys Qazaqstan memlekettik ýnıversıtetinde eki jas joǵary bilim alady, – deıdi oblystyq bilim basqarmasynyń basshysy Satqan Esenǵalıev.
Onyń aıtýynsha, bıyl ulttyq biryńǵaı testileýdiń qorytyndysymen bilim sapasy 57,3%-dy qurap otyr. О́kinishke qaraı, fýnksıonaldyq saýattylyqqa baılanysty halyqaralyq zertteýler (PISA) boıynsha oqýshylar respýblıkadaǵy tómen kórsetkishke ıe bolǵan.
– Atyraý oblysynda bilim berýdi damytýdyń 2021-2023 jyldarǵa arnalǵan jol kartasynyń baǵdarlamasy qabyldandy. Bul baǵdarlama Nazarbaev zııatkerlik mektepterimen birlese júzege asyrylýda. Jol kartasy aıasynda 50 mekteptiń jumysy zerdelendi. Keshendi zertteý nátıjesinde mektepterdegi problemalar tolyqtaı anyqtaldy, – deıdi S.Esenǵalıev.
Qazir 413 pedagogtiń jetispeýshiligi týyndap otyr. Orys synyptary jáne orys toptaryna 331 maman qajet. Matematıka, orys synyptaryna dáris beretin qazaq tili men ádebıeti pániniń muǵalimderine suranys artqan. Bastaýysh synyptarynyń ózine 100-ge jýyq pedagogtiń orny bos tur. Atyraý qalalyq bilim bólimi basshysynyń orynbasary Amanbaı Husynovtyń málimetinshe, qazaq synybyna 58, orys synybyna 28 muǵalimge suranys berilgen. Bıyl M.О́temisov atyndaǵy Batys Qazaqstan memlekettik ýnıversıtetin bitirgen 19 jas maman mektepterge jumysqa ornalasqan.
Taǵy da derekke júginer bolsaq, óńirde tórt mektep apattyq jaǵdaıda tur. Al 11 mektep sabaq úsh aýysymmen oqytady. Bul máseleni oń sheshý úshin bıyl 11 mektep paıdalanýǵa berilgen. Endi 15 mekteptiń qurylysy júrip jatyr. Endi alty mekteptiń qurylysy bastalady. Erekshe bilimdi qajet etetin 6 653 bala bar. Olardyń qatarlastarynan qalmaı bilim alýy úshin 159 mektepte qolaıly jaǵdaı jasalypty. Jalpy, óńirde 14 myń muǵalim dáris beretin 197 mektepte 143 myńnan astam oqýshy sabaqqa barady. Onyń ishinde mektep tabaldyryǵyn alǵash ret attaıtyn 14 241 bala bar.
– Mektep muǵalimderi tolyq vaksına aldy. Barlyq mektepke dezınfeksııalyq quraldar satyp alyndy. Oqýlyqtardy satyp alýǵa 1 mlrd 667 myń teńge qarjy bólindi. Kelisimshartqa sáıkes oqýlyqtardy 15 baspa jetkizip beredi, – deıdi basqarma basshysy.
Atyraý oblysy
