«Basty maqsat – 2025 jylǵa qaraı AKT ónimderiniń eksportyn 500 mln AQSh dollaryna jetkizý (qazir 30 myńdaı). Bizdiń sala basqalarǵa qoldaý kórsetip qana qoımaı, ekonomıkaǵa tikeleı paıda ákele alatynyn dáleldeýimiz kerek. Bul úshin eń aldymen IT-mamandardyń tapshylyǵyna qatysty máseleni sheshý qajet», dedi ol.
Onyń sózinshe, sıfrlandyrý salasynda jumys isteıin kisiler IT-naryqta mamandar jetispeıtinin jaqsy biledi. Sondyqtan 2025 jylǵa deıin 100 myń IT-mamandy daıyndaýǵa kúsh salamyz. Osy maqsatta matematıkaǵa qabiletti qazaqstandyqtarǵa jeke jáne memlekettik IT-mektepterde oqý úshin IT-vaýcherler beriledi. 2025 jylǵa deıin 20 myń vaýcher berýdi josparlap otyrmyz, deıdi.
Sonymen qatar túlekterdiń sapasyn kóterý úshin Bilim jáne ǵylym mınıstrligimen birge JOO men kolledjderdegi oqý baǵdarlamasy qaıta qarastyrylady. Baǵdarlamalaýdaǵy kóne sózder (pascal, basic) men eski tehnologııalar kelmeske ketedi. IT biliktilikti rastaıtyn táýelsiz ortalyqtar qurylady.
«Sondaı-aq IT-naryq pen ulttyq kompanııalardyń kollaborasııasy týraly másele kóterildi. Satyp alý úrdisi kezinde ulttyq kompanııalardyń nazaryn otandyq tizilimge aýdartý úshin otandyq baǵdarlamalyq jasaqtama reestrin odan ári ulǵaıtamyz. BI Group-taǵy tájirıbeme súıenip aıtarym, dástúrli salalar IT-mamandarmen birikse, jańa startaptar jasaı alady. Qazaqstan basqa eldermen salystyrǵanda, qaı salada basym? Mine, osy salalardy jasampaz IT-kásipkerlermen biriktirsek, biraz másele sheshilip, jańashyldyqtarǵa jol ashylar edi. Bul oraıda munaı-gaz, qurylys, TMK jáne ýran ónerkásibine kúsh salamyz», dep jazdy Mýsın.
Jas IT-mamandarǵa kómektesý úshin memlekettiń jáne ulttyq kompanııalardyń qoldaýymen venchýrlyq qorlar qurylady.
«Sıfrlandyrý máselesiniń ekinshi bóliginde memlekettik basqarýdy sıfrlandyrý jaıy kóterildi. Bul oraıda Prezıdentke STO bastamasyn qoldaǵany úshin alǵys aıtamyn. Eski prosesterdi avtomattandyrýǵa tosqaýyl qoıamyz. First reınjınırıng qaǵıdasyna kóshemiz. Iаǵnı sıfrlandyrýdan buryn, aldymen úderisterdi jóndep, jetildirip, jańǵyrtý kerek», dep túsindirdi ol.
Mınıstr platforma jaıly da sóz qozǵady.
«Bul taqyrypqa kúdikpen qaraıtyndar kóp, biraq Gýgl, Amazon, Alıbaba, Iаndeks, Kaspı jáne basqalary negizinde sıfrlandyrýdyń platformalyq modelin paıdalanady. Al bizde she? Qazir bizde túrli tehnologııalar men baǵdarlamalardyń kóne tilderine negizdelgen 400 aqparattyq júıe men derekter bazasy bar. Osynyń kesirinen keıde op-ońaı servısterdi engizýdiń ózi bir jylǵa jýyq ýaqytty alady. Sondyqtan seriktestermen birge platformalyq úlgige ótemiz. Sóıtip eski aqparattyq júıeden jańa zamanaýı qazaqstandyq platformaǵa kóshirý tapsyrystary otandyq IT-naryqtyń odan ári jandanýyna jol ashady», dep jazdy Sıfrlyq damý, ınnovasııalar jáne aeroǵarysh ónerkásibi mınıstri.
Nátıjesinde azamattar qyzmetterdiń 100 paıyzyn áp-sátte smartfon arqyly ala alady.
