Fedor Dostoevskııdiń 200 jyldyǵyna arnalǵan bul týyndyda Dýnaı Espaev Shoqan Ýálıhanovtyń rólin somdady.
– Meniń túrim Shoqan Ýálıhanovqa uqsamaıdy. Róldi grımsiz jáne ofıser kıiminsiz oınadym. Rejısserdiń sheshimi osyndaı boldy. Eń basty maqsat – keıipkerimniń jarqyn bolashaqqa umtylysyn, onyń patrıotızmin, óz ıdeıalaryn qalaı qorǵaı alǵanyn kórsete bilý kerek boldy, – deıdi Dýnaı Espaev.
Al Galına Týrchına bolsa, áıgili jazýshynyń áıeli Marııa Isaevanyń rólin oınady.
– Dostoevskııdiń birinshi áıelin oınaý men úshin úlken mártebe boldy. Fılmde meniń keıipkerim sóılemeıdi, sol sebepti onyń obrazyn shyǵarý óte qıyn boldy. Fıodor Mıhaılovıch – meniń súıikti jazýshym. Onyń eńbekteri men ómirbaıanyn jaqsy bilemin. Keıde ýaqyt mashınasyna otyryp, ótkenge oralǵan sııaqty kúı keshtim. О́te qyzyqty tájirıbe boldy, – dep aǵynan jaryldy aktrısa.
Eske salar bolsaq, jazýshy bolashaq jary Marııa Isaevamen Semeıde kezdesken bolatyn. Sondaı-aq ol bul qalada Shoqan Ýálıhanov, Petr Semenov-Tıan-Shanskıı jáne Aleksandr Vrangel syndy óz zamanynyń belgili adamdarymen tanysyp, aralasqan.
Semeıde turǵan kezinde Fedor Dostoevskıı «Dıadıýshkın son» jáne «Selo Stepanchıkovo ı ego obıtatelı» hıkaıalaryn jazdy, «Zapıskı ız Mıortvogo doma» týyndysyn bastaǵan.
Atalǵan fılm Reseıdiń birneshe qalasynda túsirilgen. Qazaqstanda túsirý alańy retinde áıgili jazýshynyń Semeıdegi ádebı-memorıaldyq murajaıy tańdaldy.
QARAǴANDY
