Elorda ákimi Altaı Kólginov óndiristik jaraqattardyń aldyn alý úshin qandaı sharalar atqarylyp jatqany týraly aıtty.
Altaı Kólginov qurylysshylardyń qaýipsizdik erejeleriniń saqtalýyn qadaǵalaýdy kúsheıtý qajettigin eskertti.
«Qala kásiporyndary, ásirese, qurylys nysandary qaýipsizdik erejelerin buljytpaı saqtaýy qajet. Adam ómiri men kompanııalardyń bedeli osyǵan tikeleı baılanysty. О́ndiristik jaraqattanýdy azaıtý úshin birqatar júıeli shara qabyldanyp jatyr. Búgin áleýmettik áriptestik jáne eńbek qatynastaryn retteý jónindegi komıssııa otyrysynda ózekti máseleler qaraldy», dep jazdy ol óziniń Instagram paraqshasynda.
Ákimniń sózine súıensek, osylaısha kásipodaq jáne jumysshylar konfederasııasy birlesip, nysandarda qaýipsizdik erejelerin saqtaý jumysyn kúsheıtpek. Tártip buzylǵan jaǵdaıda qyzmetkerlerdiń qaýipsizdigi qamtamasyz etilmeıinshe qurylys nysandarynyń jumysy toqtatylady.
«Budan basqa, qurylys nysandarynda qaýipsizdik sharalaryn saqtaýǵa arnalǵan monıtorıng jumystaryn qosymsha kúsheıtemiz, eńbek qyzmeti taraptarynyń quqyqtary men mindetterin túsindirý úshin kásiporyndarǵa barý jalǵasady. Sondaı-aq, memlekettik kirister departamenti jumys berýshilerdiń mindetti zeınetaqy jarnalary men áleýmettik tólemderdi tóleý máselelerin baqylaýda ustap, iri boryshkerlerdiń tólemder máselelerin sheshýi qajet», dedi ol.
