Aldyńǵy jetistigimizdi jaqsartqan Paralımpıada

12 kúnge sozylǵan Paralım­pıa­danyń ekinshi kúninde Tokıodan aqjoltaı habar jetti. Paýer­lıftıngten 54 kılo salmaq dárejesinde jarys jolyna shyqqan otandasymyz Davıd Degtıarev Qazaqstan qorjynyna altyn júldeni saldy. Saıys nátıjesi boıynsha Davıd úsh múmkindiginde 174 kılo ziltemirdi esh qıyndyqsyz eń­serip, Paralımpıada chempıony atandy. 1996 jyly Aqmola oblysynyń Atbasar qalasynda dúnıege kelgen Davıd Degtıarev paýerlıftıngpen 2016 jyldan beri shuǵyldanady. Ol 2021 jyly Tblısıde ótken Álem Kýbogynda 185 kılony eńserip, Azııa rekordyn jańartqan bolatyn. Sonymen qatar osy sport túrinde synǵa túsken Rıo Paralımpıadasynyń kúmis júldegeri Raýshan Qoıshybaeva bul joly júldegerler qataryna ilige almady.

Keıingi jarys kúnderinde qazaqstandyq úsh paradzıýdoshy jarystyń fınalyna deıin jetip, úsheýi de jarysty kúmis júldemen qorytyndylady. Atap aıtar bolsaq, 60 kıloda beldesken Ánýar Sarıev fınalda ázerbaıjandyq Výgar Shırınlıge ese jiberse, 73 kıloda tatamıge shyqqan Temir­jan Dáýlet altyn júlde úshin ótken beldesýde ózbekstandyq Ferýz Saıdovtan jeńilip qal­dy. Al qyzdar arasynda óner kórsetken Zarına Baıbatına (70 kg) fınaldyq sa­ıysta ázer­baı­jandyq Dýrsadaf Karımovadan basym túse almady. Osylaısha, úsh balýanymyz kúmis júldeger atanyp, mereıimizdi tasyt-
ty.

Sonymen qatar parajú­zý­­shilerimiz de júldesiz qalmady. Rıo Paralımpıadasynda Zúlfııa Ǵabıdýllına bastap bergen je­ńisti joldy Tokıoda Nurdáýlet Jumaǵalı jalǵady. 100 metrge brass ádisimen júzýden S-13 sanatynda (kóz janary zaqym­danǵan) jerlesimiz úshinshi nátıje kórsetip, qola júlde en­shiledi. О́kinishke qaraı, Para­lımpıada chempıony Z.Ǵabı­dýllına fınaldyq saıysqa jol­dama alǵanymen, bul joly júldegerler qatarynan kórine almady.

Osylaısha, Paralımpıadadan Qazaqstan quramasy óz tarıhynda tórt medal ıelenip, rekord ornatty. Sondaı-aq jerlesterimiz birinshi ret Jazǵy oıyndardyń tolyq medal (altyn, kúmis, qola) jıyntyǵyn jeńip aldy.

Aıta keteıik, Tokıoda Qa­zaq­stan quramasynyń 26 (10 áıel, 16 erkek) sportshysy sporttyń 7 túrinen baq synady. Onyń ishinde eń kóp sportshy sýda júzý men dzıýdodan (7 sportshy). Sonymen qatar elimizdiń sportshylary alǵash ret parakanoe men paranysana kózdeýden joldama ıelengenin atap ótken jón.

Endi kelesi Paralımpııa oıyn­dary úsh jyldan keıin, ıaǵnı 2024 jyly Parıjde (Fransııa) ótedi.