Astanada turatyn aǵaıynymyz balasyn úılendirgen. Oı salarlyq toıdyń ón boıy ulttyq naqyshta ótken...
Sol úıge taǵy kelip turmyz. Aǵaıynymyz nemereli bolǵan. Aldymen esikti kelin ashty. Iilip turyp sálem saldy. «Kóp jasany» aıtyp, kóńilim kókke jetip qaldy. Qatty qýandym.
Astanada turatyn aǵaıynymyz balasyn úılendirgen. Oı salarlyq toıdyń ón boıy ulttyq naqyshta ótken...
Sol úıge taǵy kelip turmyz. Aǵaıynymyz nemereli bolǵan. Aldymen esikti kelin ashty. Iilip turyp sálem saldy. «Kóp jasany» aıtyp, kóńilim kókke jetip qaldy. Qatty qýandym.
Osy kezde bir shyjyq boldy. Bizben seriktes bolyp kelgen janymdaǵy jamaǵaıyn: «Oı, qaraǵym, munyń ne? Qoı ondaıyńdy», dep bezektedi de qaldy. Tipti, júgirip baryp ıyǵynan kóterip jatyr. Odan jastaý qonaq qolyn qaltasyna salyp tur. Shamasy, aqsha qystyrǵysy kelgendeı. Kireberis dálizdegi «yńǵaısyz» kórinis kim-kimniń de mańdaıynan ter shyǵarǵandaı edi.
Sonda bul ne bolǵany? Tereń pálsapaǵa barýdyń keregi joq. Bul bárimizdiń kóz aldymyzdaǵy, kópten kele jatqan ashy shyndyq. Oǵan kóndigip, etimiz úırenip ketken. Sálemdi bylaı qoıyp, kelinniń qabaǵyna qaraǵyshtaıtyn daǵdy basymdyq alǵandaı emes pe, qazir?
Sálem salýdy «eskiliktiń sarqynshaǵy» degen syńaıda jyly jaýyp qoıǵanymyz ras. Olaı bolsa, ájeptáýir qyzmettegi álgi kelin nege ıilip izet qylady? Demek, ýaqyt ózgergenimen, ishki ádet-ǵuryp, ulttyq dúnıetanym báribir umytylmaıdy. Adam balasynyń eń basty qýanyshy – úılený toıy betasharsyz ótip kórdi me? Árıne, ótpeıdi!
Másele betashardyń bátýasyn baǵamdaı bilýde, qadir-qasıetin túsirmeýde ǵoı. Eń qymbat tilekterimiz, úmitterimiz osynda aıtylady. Sálem salý osy tilekterdi qabyl aldym, el-jurtqa kiriktim, aǵaıynmen taǵdyrlaspyn degendi bildireri haq. Ulyq uǵymnyń tutqasy – qaıynjurtty ǵana emes, qalyń jurtty syılaýda, irgeni bekemdeýde. Dál osy tusta eń basty tárbıeshige aınalýǵa tıisti asabalar («tamada» degen kelińkireıdi) qolyndaǵy qara dombyranyń qasıetinen tómendep jatatynyn, ony ýaǵyz úni emes, tabys kózimen bezildetetinin baıqamaıtyn sııaqty. Kópshiliktiń aǵyl-tegil aqyly da aspanǵa ushyp jatady. О́ıtkeni, ol tereń tuzdyqtalmaıdy. Osydan kelip bir mezettik sálem paıda bolady. Toıdan keıin umytylady.
Ár nárseniń jóni men josyǵy bar degenniń ózinde, qut kelinderdiń sálem salǵanynyń nesi ersi? Alashtyń ata-analary, qadirli qudalar, barshamyz oılanyp kóreıik.
Baqbergen AMALBEK,
«Egemen Qazaqstan».
Aqmola oblysy.
