Qoǵamdyq ómirimizge sony serpin bergen jańa Joldaýynda el Prezıdenti Qasym-Jomart Toqaev «otandyq IT-sektordy damytyp, kúsheıte túsý de mańyzdy. Elimizge jas, bilimdi ári yntaly mamandar kerek. Sıfrlandyrý jónindegi ulttyq jobanyń aıasynda keminde 100 myń joǵary bilikti IT-maman daıarlaý qajet» degen bolatyn. Bul bolashaqty baǵdarlaǵan, el kelesheginiń kókjıegin keńeıtýge baǵyttaıtyn keleli pikir.
Mektep oqýshylarynyń týyndysy tańdaı qaqtyrarlyq eken. Qarapaıym ǵana basqarý tetigi arqyly ónerli oqýshylar robottardy erkin basqarady. Ánsheıinde sál ebedeısizdeý bolyp kóringen robottar áldebir tetikterdi qurastyryp jatyr. Aıtqanyńdy eki etpeıtin qolqanat tárizdi kerek zatyńdy da lyp etkizip alyp keledi. Bala qııalyn baýraǵan ǵajap bir álem. Kúni erteń osy oqýshylardyń zamanaýı tehnologııalardy búge-shigesine deıin meńgerip, balalyq qııaldaǵy ádemi armanmen astasqan muratyna jeteri kúmán týǵyzbaıdy. Jańa bilim oshaǵynda robot tehnıkamen qatar IT salasyna da aıryqsha mán berilip otyr.
– Oqý baǵdarlamasynda ózindik erekshelikterdiń bolatyny sózsiz. Basymdyq IT salasyna aýdarylady. Robot tehnıka, baǵdarlamalaý, 3D modeldeý sııaqty pánder oqytylady. IT salasy aıryqsha qarqynmen damyp kele jatqan sala, – deıdi IT lıseı-ınternatynyń dırektory Aıbek Dosymbekov, – bizdiń elde sala mamandary mol suranysqa ıe. Aldaǵy ýaqytta osy olqylyqtyń ornyn toltyrý baǵytynda jumys isteıtin bolamyz.
Bilim oshaǵynyń basshysy el Prezıdenti qoıǵan talap údesinen shyǵýǵa umtylatyndyqtaryn jetkizdi. Jańalyqtyń jarshysy bolyp otyrǵan mekteptiń irgetasy 2019 jyly qalanǵan eken. Ústimizdegi oqý jylynan bastap IT lıseı-ınternatyna aınalyp otyr.
– Oqýshylardyń álemdik deńgeıdegi IT mamany bolýy úshin bar múmkindikti jumyldyrýymyz qajet, – deıdi qamqorlyq keńesiniń múshesi Ádilhan Mýsın, – aldaǵy ýaqytta IT qaýymdastyǵymen birlese jumys isteımiz.
Lıseı-ınternat 800 orynǵa laıyqtalǵan. Jańa oqý jylynda 500-den astam oqýshy bilim alýda. Bir jaqsysy, oqýshylardyń deni jergilikti jerden. Basqa aımaqtardan kelgen oqýshylar úshin jaıly jataqhana qarastyrylǵan. Býrabaı baýraıynda bolashaqtyń irgetasy qalanyp jatyr.
Aqmola oblysy,
Býrabaı aýdany
