Top músheleriniń aıtýlaryna qaraǵanda, qazir nasıhat tobynyń azamattyq shtabyna 200-ge jýyq joǵary bilikti maman enip otyr. Olardyń qatarynda medısına, kásipkerlik jáne qoǵamdyq salalarda el nazaryna ilinip júrgen belsendiler, atap aıtqanda, Vıacheslav Lokshın, Jibek Joldasova, Rafaıl Rozenson, Dınara Sátjan, Rahym Oshaqbaev jáne t.b. bar.
R.Oshaqbaev jaman indetti quryqtaý jolynda vaksınanyń róli zor ekenine túrli dálel keltirdi. Koronavırýspen syrqattaný áli de azaımaı tur. Soltústik Qazaqstan oblysynda 26 tamyzda antırekordtyq kórsetkish tirkelip, bir táýlikte 171 adamnyń boıynan kovıd indeti tabylǵan. Qazirgi jaǵdaı odan eki ese tómen bolǵanyna qaramastan, syrqattaný serpininiń tómendemeýi alańdatady. Vırýsty juqtyrý qarqyny boıynsha Qazaqstan qazirgi ýaqytta 100 myń adamǵa shaqqanda álemde 30-oryndy ıelenedi. Eń kóp juqtyrý 2021 jylǵy 7 tamyzda tirkeldi, ol kezde juqtyrý kórsetkishi 8 325 adam bolǵan. Al bir ǵana 19 tamyzda elde 163 adam indetten qaıtys bolǵan. Qazirgi ýaqytta aýrýdyń sharyqtaý shyńy ótti, biraq ólim sany áli de joǵary deńgeıde. Osy sekildi derekterdi alǵa tarta kelip, azamattyq shtabtyń belsendileri vaksına alý pandemııany toqtatýdyń jalǵyz joly ekenin jetkizdi.
Shtab belsendileri qazir elimizde vaksına alý qarqynynyń tómendegenin atap ótti. Máselen, shilde aıynyń ortasynda táýligine 130 myń adamǵa deıin vaksına alsa, qazir nebári 30 myń qazaqstandyq ımmýndalýda. Soltústik Qazaqstan oblysynda vaksınalaý qarqyny jalpy respýblıkalyq deńgeıden birshama artta qalyp otyr. Búgingi tańda vaksınanyń tolyq kýrsyn 209 myń adam alǵan. Bul vaksına alýǵa nıet bildirgenderdiń 67%-y.
«Eldegi jaǵdaı ótken jylmen salystyrǵanda aýyr. Bıylǵy kórsetkish táýligine 8,3 myń bolyp, alty esege deıin ósti. Byltyr 15 tamyzda ambýlatorııalyq jáne stasıonarlyq emdelýde júrgen 20 myń adam resmı túrde tirkelse, bıyl osy kórsetkish 117,8 myńǵa deıin ulǵaıyp otyr. О́tken jyly stasıonarda 3,4 myń adam emdelse, bıyl bul kórsetkish 31,5 myń adamǵa deıin jetti. Biz Qazaqstanda vaksınalaý qarqynynyń óte tómen ekenin kórip otyrmyz. Bul pandemııanyń joǵary kórsetkishterine jáne ólim-jitimniń kóbeıýine áser etedi. Qazirgi ýaqytta elimizde vaksınalaýǵa jatatyn 10 mln adamnyń 7 mln-y ǵana vaksınalandy», dedi R.Oshaqbaev.
Azamattyq qoǵam ókilderi et jaqyndarynyń densaýlyǵy úshin otandastarymyzdy sanaly tańdaý jasap, ekpe alýǵa baılanysty birigýge shaqyrdy. Kezdesýge qatysýshylar bul úshin belsendi aqparattyq jumys qajet degen ortaq pikirge keldi, óıtkeni obektıvti aqparattyń jetkiliksizdigi halyqtyń ımmýndaýǵa senimsizdigine ákep soqtyrady.
Soltústik Qazaqstan oblysy
