Qabanbaı aýylyndaǵy №1 mektepti sátti aıaqtaǵan soń Almatydaǵy kolledjde bilim alyp, psıholog atanyp shyqty. Nur-Sultan qalasyndaǵy «Turan» ýnıversıtetinde oqyp, ekonomıst mamandyǵyn aldy. Eńbek jolyn Qyzylsýat mektebinde bastaǵan. Áýeli árqıly mátinderdi terip, qolǵabysyn tıgizdi. 2016 jyldan beri aýdandyq ardagerler keńesiniń jaýapty hatshysy.
Qaǵylez qyz bul kúnde qarǵa adym jer muń bolyp qalǵan qarııalardyń qolǵanaty. Tirshiliktiń árqıly máselesimen kún saıyn dúmep kelip jatqan adamdardyń ótinishin jerge tastaǵan kezi joq. Qolynan kelgeninshe kómektesedi. Jalǵyz qarttar ǵana emes, jastardyń jaıy da tolǵandyrady. Sondyqtan eki jerde birdeı qyzmet etip júrgen jaıy bar. Aýdandaǵy jastar resýrstyq ortalyǵynda el qorǵany – eriktilerdiń jumysyn uıymdastyrýda.
О́tken aptada ǵana Sofıevka jáne Talapker aýyldarynda turatyn 60-tan astam ardagerge jyly kıimder men jeńil-jelpi kerek-jaraqtaryn jetkizip berdi. Áldebir sebeptermen turmys qajytyp júrgen kópbalaly otbasylar men jalǵyzilikti jandarǵa ózgege degende ózegin julyp berýge daıyn eriktilerdi jumyldyryp, 800 myń teńgeniń shamasynda kómek kórsetti. Qamqorlyqtan múmkindigi shekteýli adamdar da qaǵys qalǵan joq. Olardyń jaıyn túsinetin bir jan bolsa, Álııanyń ózi emes pe?!
El ishindegi ómirdiń tynysyn tamyrshydaı tap basyp tanysań, kem-ketiktiń áli de kezdesip qalatyndyǵyn ańǵarar edińiz. Dastarqandary adal astan kem bolmasa da qamkóńildi jibitetin, qoltyǵynan demeıtin, úmit otyn laýlatatyn janashyr sóz kerek. Sóz – emshi. Kemtigin tolaıym toltyryp tastamasa da, kóńilin demdeıdi, jubatady, muń shymyldyǵyn serpedi.
Ár aksııany ótkizgen saıyn Álııa Ápsatqyzy eń bastysy materıaldyq kómek emes, jan jylýy ekenin aıqyn túsindi. Árkimniń kóńilindegi kirbińniń sebebin bilip, janynyń jamylǵysyn sıpasa, qart kóńil de qulyndaı quldyrańdaıdy eken-aý. Aýdannyń belsendi jastary Sofıevka aýylyndaǵy 10 otbasyna 290 myń teńgege kúzgi maýsymda kıetin jyly kıim-keshek alyp berdi. Álııa Ápsatqyzynyń aıtýynsha, olar muqtaj jandardy kıimderimen jylytqan joq, kóńilderimen jylytty. Janashyr járdemderimen jandaryn jadyratty. Al el qamyn jegen eriktiler bolsa, qas-qaǵym sáttik qýanysh bolǵanymen, kómekke zárý adamdardyń qoltyǵynan demegenderinen lázzat alady.
Taǵy bir joly aýyldyń 47 otbasyna jalpy quny 470 myń teńge turatyn azyq-túlik sebetin taratty. Jalpaq álemdi jaman tumaý jaılaǵan kezde qoldary qysqaryp qalǵan adamdar ózderiniń qıyndyqpen jalǵyz kúresip jatpaǵandyǵyn, dál jandarynda, irgelerinde árdaıym qamqor qoldaryn sozyp, kómek kórsetetin, qysylǵanda demeıtin jany jomart adamdardyń bar ekendikterin aıqyn sezinip, ishki túısiktiń senimdiligi nyǵaıa tústi. Álııa Ápsatqyzynyń paıymdaýynsha, eń bastysy da osy. Eriktiler osyndaı izgi nıet, adal kóńildiń arqasynda el ishindegi birliktiń dáneker jibin bekite túsedi. Kóppen kórgen kúnniń, elmen birge kórgen aýyrtpalyqtyń júgi osylaısha jeńildemek.
Alda qyraýly qys kele jatyr. Eriktilerdiń endigi atqarar isiniń baǵyty qys qamy. Júzden artyq otbasyǵa otyn, kómir alýǵa kómektesý kerek. Jalǵyzilikti adamdardyń arasynda jyly kıimge zárýler de bar. Olardyń eshqaısysy qamqor kóńildiń nazarynan tys qalmaq emes.
– О́tken jyly bizdiń aýdannyń eriktileri aldyn ala tizim jasap, qarttardy qamqorlyqqa aldy, – deıdi Álııa Ápsatqyzy, – eńbek ardagerleri men zeınetkerlerdiń, jalǵyzilikti jandardyń aýlalaryn qardan tazartyp berdi. Tipti aıtýǵa da turmaıtyn shaǵyn ǵana sharýa bolǵanymen, qarttardyń kóńilderi kóktem kelip qalǵandaı jadyrap sala berdi. Olardyń kózderinen qýanysh otyn kórýdiń ózi bir baqyt. Otyn-kómirmen de qaraılastyq. Bıyl da sol dástúrdi jalǵastyrmaqshymyz. Qys synaǵynan birlesip shyqsaq, eshkim de qysylmaıtyn bolady.
Izgilikti isterdiń uıytqysy bolyp otyrǵan Álııa Ápsatqyzynyń aıtýyna qaraǵanda, kóktem shyǵysymen aýyldyq okrýgterde san márte senbilik uıymdastyrylǵan. О́ńirdegi qasıetti jerler muntazdaı etip tazartylyp, býlyǵyp jatqan bulaq kózderi ashylypty. Budan basqa da sharýa jeterlik. Máselen, Birlik pen Mortyq aýyldarynda uıymdastyrylǵan aksııa barysynda 750-den astam kóshet otyrǵyzylǵan. Jaz boıy sýaryp, baptap ósiripti. Birer jyldan soń báıterekter jaıqalyp, ushar basy kókke órlese, el erteńin oılaǵan eriktilerdiń isi dep jalpaq jurttyń úlgi eteri anyq. Muny kórgen keıingi jastar da dál osylaısha qımyldamas pa?
Eriktiler ózge de jobalardy qolǵa alýda. Onyń ishinde ekologııa, patrıottyq máselelerdi qamtıtyn jobalar bar. Keı-keıde kóńildegi oıdy bazardaǵy naryq buzyp ketedi. Jaqsylyqtyń jolyna jan túrshiktirerlik jaman tumaýdyń ózi bógesin bolǵan joq. Karantın kezinde qoly qysqaryp qalǵanda eriktiler psıhologter men zańgerlerdiń onlaın keńesin ótkizip, kezdesýler uıymdastyrýdy qolǵa aldy. Memleket tarapynan kórsetilip jatqan kómekti qalaı alýǵa bolatyndyǵyn táptishtep túsindirdi. Tórt qabyrǵaǵa qamalyp otyrǵan qarııalarǵa bul da kerek edi.
Ázirge Álııa Ápsatqyzynyń bir jınaǵy jaryq kóripti. Ádebı ortadan jyraq jatqan talapkerdiń talpynysy. Mektepti orys tilinde bitirgendikten sol tilde jazý qolaıly eken. Teris deı alǵan joqpyz. Eń bastysy, oqyrmanyn beıjaı qaldyrmaıtyn, túpsiz bir tereńge jeteleıtin, oralymdy oıǵa shomyldyratyn jyr joldary. Negizgi dińgegi – ómir. О́mir týraly óz paıymy. Tirshilik týraly tolǵanys. Qulshyna, qunyǵa oqyǵan saıyn pende balasyna bir-aq ret buıyratyn qamshynyń sabyndaı qysqa ǵumyrda ómirdiń keıbir synyna ókpelemeı ǵashyq bolǵan jón eken. Sonda ǵana tórt qubylań tegis nurlanyp turmaq. Álııanyń ádemi jyrynan jadyǵa túıgenimiz osy.
Aqmola oblysy,
Selınograd aýdany
