Qoǵamdyq keńistik tujyrymdamasy ýrbanıstik sáýletshilerdiń osy kóktemde aýdan turǵyndarymen ótken birneshe kezdesýinen keıin jasaldy.
Abattandyrý jumysy eki kezeńge bólinedi dep habarlandy. Birinshi kezekte Uly Dala dańǵylynan Ońǵarsynova kóshesine deıingi ýchaske jóndeledi. Munda shamamen 19 myń sharshy metr aýmaq kógaldandyrylady, sol sııaqty 20 myń sharshy metrden asatyn trotýar tósemderiniń alańy salynady. Ekinshi kezekte Ońǵarsynova kóshesinen Hýseın Ben Talal kóshesine deıingi ýchaskede osyndaı jumystar júrgiziledi. Kógaldandyrý aýdany – 15 568,1 sharshy metr. Trotýar tósemderiniń aýdany – 14 692 sharshy metr.
Bul aýmaqta eresekter de, balalar da bos ýaqytyn tıimdi ótkize alady.
«Qoǵamdyq keńistikti qurý kezinde múmkindigi shekteýli jandarǵa yńǵaıly bolý úshin «adamdarǵa arnalǵan qala» tujyrymdamasy eskeriledi. Bul da «Nur-Sultan – jaıly qala» master-jospary aıasynda ýrbanısterdiń turǵyndarmen ornatqan qarym-qatynasynyń nátıjesi. Árıne, navıgasııa, elordanyń dızaın-kody boıynsha kógaldandyrý máselesi de eskerildi», - dep atap ótti Nur-Sultan qalasynyń Sáýlet, qala qurylysy jáne jer qatynastary basqarmasynyń basshysy Nurlan Uranhaev.
