Ǵalymdar beıtaraptandyrý reaksııasyna test ótkizdi, nátıjesinde otandyq «QazVac» vaksınasymen egilgenderde antıdene joǵary deńgeı kórsetti. Vırýsty beıtaraptandyratyn antıdeneler klınıkalyq zertteýge qatysqan eriktilerdiń 90%-nan astamynda anyqtaldy.
Sondaı-aq zerthanada janýarlarǵa tájirıbe júrgizilgen.
«Biz QazVac vaksınasy qurǵan antıdenelerdiń «ýhan», «brıtandyq alfa», «úndilik delta» sııaqty koronavırýstyń jańa shtamdaryn beıtaraptandyrý qabiletin anyqtaý maqsatynda zertteý júrgizdik. Nátıjeler vaksınasııadan keıingi antıdenelerdiń ımmýnıtetti qalyptastyratynyn jáne vırýstyń úsh túrin de beıtaraptandyrýǵa qabiletti ekenin kórsetti. Sondaı-aq zerthanalyq janýarlarǵa tájirıbeler júrgizdik: «QazVac» vaksınasyn alǵan jáne vaksınasııalanbaǵan zerthanalyq homıaktardy aldyq. Biraz ýaqyttan keıin olarǵa delta shtammyn juqtyrdyq. Nátıjesinde vaksınasııalanbaǵan homıaktar koronavırýstyń «delta» shtammyn juqtyrdy. Al «QazVac» vaksınasymen egilgen janýarlar aýyrmady», dep atap ótti QR BǴM ǴK bıologııalyq qaýipsizdik problemalary ǵylymı-zertteý ınstıtýtynyń bas dırektory Kúnsulý Zakarıa.
«Alynǵan málimetter «QazVac»-tyń koronavırýstyń bar shtamdaryna qarsy tıimdiligin, onyń ishinde otandyq vaksınanyń delta shtammynan qorǵaý qabiletin rastady», dep jazady BǴM baspasóz qyzmeti.
