Jıynǵa aýyl sharýashylyǵy salasynyń mamandary, ardagerleri, sharýa qojalyq ıeleri men jergilikti atqarýshy organ ókilderi qatysty. Bul týraly Mańǵystaý oblysy ákiminiń baspasóz qyzmeti habarlady.
Kezdesýde jem-shóp daıyndaý, mal jaıylymyna jer berý, qudyq qazý syndy birqatar másele qaraldy. Aımaq basshysy belsendilik tanytqan azamattarǵa alǵys aıtyp, jaýapty tulǵalarǵa aýyl sharýashylyǵy salasyn jaqsartýǵa arnalǵan usynystardy zerdeleýdi tapsyrdy.
Sondaı-aq Mańǵystaý oblysy ákimdigi mal sýarýǵa qajetti qudyq qazýǵa arnalǵan sýbsıdııanyń kólemin ulǵaıtý múmkindigin qarastyryp jatqanyn aıtty.
«Tórt túlik úshin sýdyń asa mańyzdy tirshilik kózi ekenin barlyǵymyz bilemiz. Memleket basshysy Mańǵystaý oblysyna kelgen saparynda Úkimetke qudyq qazýǵa beriletin sýbsıdııa kólemin 50-den 80 prosentke deıin arttyrýdy tapsyrdy. Budan bólek, qazir biz qudyq qazýǵa jumsalatyn shyǵyndardy taǵy 10% jergilikti bıýdjetten sýbsıdııalaýdy qarastyryp jatyrmyz. Nátıjesinde sýbsıdııany 90%-ǵa deıin ulǵaıtqymyz keledi. Másele muqııat zerdelenip, oń sheshimin tapsa, oblystyq máslıhatqa usynatyn bolamyz», dedi óńir basshysy.
Nurlan Noǵaev aýyl sharýashylyǵyn damytý men mal baǵýda tıimdi tásilderdi qoldanýǵa shaqyrdy.
«Bıylǵy qýańshylyq oblystaǵy barlyq mal ıesiniń basyna túsken ortaq qıynshylyq, ortaq synaq boldy. Biz bul tyǵyryqtan birlesken júıeli jumystyń arqasynda ǵana shyǵa alamyz. Sala ardagerleriniń tájirıbesi men keńesi óte mańyzdy, ony mindetti túrde paıdalanamyz. Sondaı-aq mal sharýashylyǵymen aınalysqysy keletin ár sharýa óz múmkindigin eskergeni durys. Tabıǵı jáne klımattyq jaǵdaılar bar, jem-shóp bazasy bolý kerek, maldy baǵý qajet degendeı. Memlekettik organdar zań sheńberinde barynsha kómektesedi, biraq árbir azamattyń maly úshin jaýap bermeıdi. Aýyl sharýashylyǵyn nátıjeli júrgizý úshin júıeli jumys isteý kerek», dedi oblys ákimi.
