Bar ǵumyryn ult bolashaǵy – jas urpaqtyń tárbıesine arnaǵan óner áleminiń bıik shyńynan kóringen jan Ospan aǵa naǵyz daryndy ustaz. О́miriniń mańyzdy shaqtaryna kóńil bólsek aǵamyzdyń týyp ósken jeri, tarıhy tańǵa taýsylmas máıekti meken, ulttyq rýhtyń uıasy – Eline qut bereke qonǵan, kólderi men ózen, sýlaryna qus qonǵan kıeli de qasıetti óńir –tarıhı han joly atanǵan Qaraótkel, Jańajol jeri.
Búgingi tańda shırek ǵasyrdan astam eńbek ótili bar, 50-ge tarta memlekettiń sahna tórinde kúı oınaǵan, Aqmola óńirinde 40 jyl ult aspaptar ansambili men orkestirin basqarǵan dırıjer, sýretshi.
Respýblıkalyq jáne jergilikti gazet, jýrnaldarda úsh júzden astam maqalalary jaryq kórgen jýrnalıst, birneshe kitaptyń avtory, ádisker, ardaqty ustaz Ospan Súleımenuly – bar sanaly ǵumyryn ustazdyq jolǵa arnaǵan azamat. Shákirtteri úshin bar kúshin aıamaǵan Ospan aǵa Nur-Sultan qalasyndaǵy Balalar mýzyka mektebinde basshy bolǵan sátinde «Álem jáne áýen» jınaǵy, «Mýzyka – sheksiz álem» atty ortalyq qurdy. Qazirgi tańda «Mýzyka – sheksiz álem» qaýymdastyǵy qazaqtyń ónerli de talantty jastaryn bes jylda 30 memlekette ár túrli baıqaý-festıvaldarǵa qatystyryp, óz ónerlerin kórsetip álemge tanytqan. Qaı jerge taban tirese de shákirtteri talaı belesterdi baǵyndyryp, qazaq óneriniń qorjynyn qomaqty júldelerge toltyryp keledi.Ult múddesi úshin qanshama qazaq balasyn shet elderde talaı ret sahnaǵa shyǵaryp, ónerdi baǵalaǵan tulǵa. Aldy Germanııadan bastap, Estonııaǵa deıingi elderdiń halyqtary qazaq jastarynyń ónerlerine shynaıy rızashylyqpen qoshemet kórsetken. Osynyń bári ustazdyń naǵyz ter tókken eńbegi desek artyqtyq etpes.
«Adamnyń adamshylyǵy – ustazdan» degen sózdiń túbinde úlken maǵyna jatqany barshamyzǵa aıan. Ospan aǵa Elordamyz Astana bolǵanda boıyn qýanysh kernep, bórkin aspanǵa atqan kisi. Qýanyshtan júregindegi shattyqtyń shalqymasy kókeıine án bolyp quıyldy. Sonyń arqasynda dúnıege jaryq etip jańa án keldi. Án «Aqmolam – Astanam» edi. Sodan bul án úlken sahnalarda shyrqalyp, el, halyqtyń aldynda oryndaldy. О́leńin de, ánin de ózi jazatyn sazgerdiń bul erekshe qyry tyńdaýshynyń boıyn baýrap aldy. «Qazaǵymnyń dástúri», «Ata qasıeti», «Jastarǵa tilek», «Ǵashyqtar syry» atty ánderdiń avtory. Áninen otanǵa, eline, jerine, týǵan halqyna degen mahabbaty jalyndap, otanshyldyq sezimniń ısi ańqıdy.
Júregin tebirentken sezimderi onyń kókeıine án bolyp qana áýelemeıdi, kúı bolyp ta tógiledi. Oǵan mysal - «Naýryz samaly», «Ana baqyty», «Kóktem shýaǵy» kúıleri.
Kóńildiń keıbir sátterinde qaǵaz ben qalamyn alyp, jyr joldaryn jazýdy qosh kóredi. Boıyndaǵy barlyq bilimin, qabiletin shákirtine úıretýden eshqashan jalyqpaıtyn sheber jan. Eseli eńbektiń arqasynda týyndaǵan «Baqytqa jet, jas urpaq!» jınaǵy ózge (fransýz, nemis, qytaı) tilderge aýdarylyp birneshe memleketterdiń murajaılarynda eskertkish retinde tapsyrylǵan.
Keńes zamanynda tili muqalyp, áni jutaǵan, tipti rýhy juqarǵan tarydaı qazaqtyń jigeri janyp, rýhanı qazynanyń qadirin bilýge úndegen, halyqtyń án-jyryn nasıhattap, sýalaǵan bulaqqa sý búrikken. Ospan aǵanyń erekshe aıtatyn bir erligi bar. Árıne, ony ózi eshkimge aýyz ashyp aıtpaı, keýdesin kermeıdi. Aqmoladaǵy alǵashqy ulttyq qazaq mýzyka mektebiniń irgesin qalaǵan azamat.
Balalar mýzyka mektebinde ulaǵatty ustazdyń juldyzy jandy deýge tolyq bolady. Osy mezgil ishinde mektep qabyrǵasynda kóptegen jańa josparlar jasap, ujymymen úlken tabystarǵa jetti. Eńbek jolynda qandaı qyzmetti senip tapsyrsa da abyroımen atqara júrip, qazirde qoǵamdyq jumystarǵa belsene aralasady. Elordamyzdaǵy bilim men mádenıet salasynda ásirese til janashyry retinde ótetin barlyq is-sharanyń basy- qasynda bolady.
Keńes Odaǵy kezinen beri qazaq ultynyń tili men dilin, mádenıeti men dinin jáne urpaqtan urpaqqa jalǵasyp kele jatqan salt-dástúrin nasıhattap, kóptegen qarsy shyqqan qubylystarǵa tótep berip kúresip kele jatqan azamat.
Etken eńbegine oraı «Qurmet belgisi» ordeniniń ıegeri, QR Mədenıeti salasynyń úzdigi, QR Bilim berý isiniń úzdigi jəne qurmetti qyzmetkeri tós belgilerimen marapattalǵan.
El arasyndaǵy qurmetke óziniń baı ári salıqaly minezimen, qudaı bergen ónerimen qol jetkizýde.
Jumaǵalı Ergeshbaev
ádisker
