Eýrazııalyq damý bankiniń (EADB) baspasóz qyzmeti málimetinshe, kredıtorlar sındıkatynyń Almaty halyqaralyq áýejaıyn keńeıtý men jańǵyrtýdy qarjylandyrý sharttary týraly kelisimge qol qoıǵan. Kredıtorlar tizimine Eýrazııalyq damý banki, Eýropalyq Qaıta Qurý jáne damý banki (EQDB), halyqaralyq qarjy korporasııasy jáne DEG nemis ınvestısııalyq korporasııasy kiredi. EADB áýejaıdy 40 mıllıon dollarǵa jańǵyrtýdy qarjylandyrady, al jobanyń jalpy quny 780 mıllıon dollarǵa baǵalanǵan.
Áýejaıdyń jańa ıeleri - TAV Kazakhstan kompanııasy iske asyratyn jańǵyrtý jobasyna jańa termınal salý jáne jumys istep turǵan áýejaıdy jańǵyrtý, ótkizý qabiletiniń shekteýlerin joıý, marshrýttardy damytý, reıster sanyn ulǵaıtý, klıentterge qyzmet kórsetý sapasyn arttyrý boıynsha jumystar kiredi.
«2019 jyly pandemııaǵa deıin Almaty áýejaıy áýe kóligimen tasymaldaýdyń jalpy sanynan jolaýshylardyń 64 paıyzdan astamyn jáne júkterdiń 84 paıyzdan astamyn tasymaldady. Ony jańǵyrtý búkil eldiń ornyqty ekonomıkalyq ósýine jáne halyqaralyq kólik-logıstıkalyq ınfraqurylymnyń damýyna yqpal etetin bolady. Sonymen qatar, joba 1000-nan asa jańa jumys oryndaryn qurýǵa múmkindik beredi, bul da joǵary áleýmettik mánge ıe. Bul joba EAEO keńistigindegi halyqaralyq damý bankteri áriptestiginiń artyqshylyqtaryn kórsetedi», dedi Eýrazııalyq damý banki basqarma tóraǵasynyń orynbasary Amangeldi Isenov.
Eske salaıyq, 2020 jyldyń kókteminde TAV Airports Holding túrik holdıngi Almaty halyqaralyq áýejaıy aksııalarynyń júz paıyzyn satyp alǵan bolatyn. Mámile 415 mıllıon dollarǵa baǵalanǵan.
