«Mańǵystaý medıa» quramyna 5 aýdan, 2 oblystyq, 1 qalalyq gazetter men 1 oblystyq saıt engen iri ortalyq. Al onyń qyzmetkerleri bir jerde shoǵyrlanǵan. Munda jýrnalıster oblystaǵy jańalyqtar men oqıǵalardy aımaq turǵyndarynan bólek, respýblıka kóleminde de taratyp otyr.
Kúni keshe atalǵan ortalyq ornalasqan ǵımaratqa Mańǵystaý oblysy ákiminiń orynbasarlary – Abzal Meńdibaev pen Bekbol Orynbasarov jáne qarjy basqarmasynyń basshylary bastaǵan bir top sheneýnikter kelgen.
Tilshiler olardy ortalyqpen tanysyp, qyzmetkerlermen jolyǵar dep joramaldaǵandaryn aıtady. Alaıda aqjaǵaly azamattar ǵımaratqa kóz sala kelgen kórinedi. Sebebi tilshiler otyrǵan ǵımarat memlekettiń menshigi.
Sondyqtan bul ǵımaratta týrıster úshin qolóner buıymdary qoıylatyn kórmeler ornalastyrý josparlanǵan. Mundaı ıdeıa ortalyq qyzmetkerlerine unamaı qalǵan synaıly. Budan bólek halyq qalaýlylarynyń turpaıylyǵyna ashynǵan tilshiler saıttaryna shaǵyn maqala usynypty.
«3-shaǵyn aýdanda otyrǵanda (buǵan deıin tilshiler ınternet jelisi álsiz, shalǵaıdaǵy ǵımaratta jumys istep kelgen) jumysymyzǵa bir bas suǵyp, jaǵdaıymyzdy bilgisi kelmegen belsendi sheneýnikter endi jańa ǵımaratqa kóz alartýda ma?! Qoǵamnyń osal tusyn jóndeýge tyrysyp, halyqtyń muńyn jetkizýge tyrysqan jýrnalısterge osy ǵımaratty da kóp kórgeni me?! Joq, aımaqtyń jýrnalısterinde ala almaı júrgen óshteri bar ma?!» deıdi ortalyq jýrnalısteri.
Tilshiler atalǵan máselege oblys ákiminiń nazar aýdarýyn surap otyr.
«Qurmetti Mańǵystaý oblysynyń ákimi Nurlan Asqaruly! Qoǵamnyń, halyqtyń sózin sóılep júrgen jýrnalısterge sizdi arasha túsedi degen oıdamyz. Osy keleńsiz jaıttyń durys sheshimin taýyp berýińizdi suraımyz», deıdi olar.
