Qys tússe gazdan qysady

Sońǵy jyldary qys qaharyna mingende О́zbekstan jaǵy Ońtústikti kógildir otynnan qysýdy ádetke aınaldyryp bara jatqan sııaqty. Apta basynda kórshi el Ońtústik Qazaqstan oblysyna beretin gaz kólemin azaıtty. Buryn saǵatyna 430 myń tekshe metr gaz kelse, osy aptada onyń qysymy 120 myńǵa deıin tómendedi. Árıne, kórshiler munyń sebebin tehnıkalyq aqaýmen baılanystyrýda. Aqaý rettelgenshe «Beıneý» qoryndaǵy kógildir otyn kólemi arttyrylyp, Saryaǵashtaǵy gaz qory iske qosyldy. Biraq, báribir oblys ortalyǵynyń birneshe shaǵyn aýdandary keshegi kúnge deıin gazǵa qol jetkize almady. Qubyrdaǵy qysymnyń tómen­deýine baılanysty birqatar shym­kenttik kásiporyndarǵa gaz berýge shekteý qoıyldy. Bul – «QazTransGaz Aımaq» meke­mesi men oblys ákimdiginiń tuty­nýshy halyqty kógildir otynsyz qaldyrmaý maqsatynda ózara kelisimshart túzý negizinde qabyldanǵan sheshim. Sonymen birge, oblys ortalyǵynyń turǵyn­daryn jylýsyz qaldyrmaý úshin «Energoortalyq-3» qazandyǵy qosymsha qordan otyn alýǵa kóshti. «Bizdiń qazandyqqa gaz dál qazir saǵatyna 30 myń tekshe metrden kelip tur. Bul bizdiń kúndelikti paıdalanyp júrgen otynymyzdyń jartysy ǵana. Al jartysyn mazýt jaǵyp qamtamasyz etip otyr­myz. Áıtse de, jylý berý máse­lesinde eshqandaı kinárat bolǵan joq. Qalany jylýmen odan ári de qamtamasyz ete beremiz», deı­di «Energoortalyq-3» AQ bas dı­rektorynyń orynbasary Jar­qynbek Álimbetov. Keshe «QazTransGaz Aımaq» AQ О́zbekstan tarapynan keletin gazdyń birtindep qalypqa kele bastaǵanyn habarlady. Aqaýdyń oryn alýyna qatty aıaz sebep bolǵan kórinedi. Jalpy, gaz máse­lesinen týyndaǵan bul keleń­sizdik apta sońyna deıin retke keledi deıdi mamandar. Áıtse de, Shymkent qalasynyń mańyndaǵy «Qaıtpas», «Samal» jáne basqa da birneshe shaǵyn aýdandarǵa gaz berilgenimen, kógildir otyn qysymy áli de tómen kúıinde. Sondyqtan úıin jylytpaq túgili bir sháınek shaı qaınatyp ishe almaı otyrǵan halyq áli ári-sári kúı keshýde. Tipti, oblystaǵy tilshiler qosynyna Saryaǵashtyń keıbir shıpajaılarynda em alyp jatqan adamdar telefon shalyp, munda da jylý men jaryqtyń bolmaýynan demalýshylardyń ábigerge túsip jatqanyn aıtyp shaǵymdandy. Mine, qysqa tas-túıin daıyn bolsa da, «ózgege qaraǵannyń kúni qurysyn» degendeı, kórshi elde bolǵan aqaýdan el áp-sátte músápir bop qaldy. «Apat aıtyp kelmeıdi» degen, resmı oryndar «aqaýdyń saldarynan jaǵdaı osylaı boldy» degen aqparat taratqannan keıin, árıne, senýge májbúrmiz. Áıtse de, el «bul – jyl saıyn qaıtalanatyn «jyr», óz-aǵamdar Ońtústikti qalaı jáne qaı ýaqytta «qysyp» qoıý kerek ekenin jaqsy biledi» degen áńgimesinde bir shyndyq bar sııaqty ma, qalaı ózi... Oralhan DÁÝIT, «Egemen Qazaqstan». Ońtústik Qazaqstan oblysy.