– Budan úsh jyl buryn Astana ekonomıkalyq forýmy aıasynda Shell kompanııasymen «Kún energııasy – mektepterge» pılottyq jobasyn iske asyrý maqsatynda memorandýmǵa qol qoıylǵan edi. Atalǵan pılottyq joba «jasyl» ekonomıkaǵa birtindep kóshý, parnıktik gazdardy qysqartý, jańartylatyn energııa kózderin damytý syndy birneshe maqsatty iske asyrýdy kózdeıdi. Sondaı-aq oqýshylardyń naqty ǵylymdardy (STEM) zertteýge qyzyǵýshylyǵyn oıatyp, ekologııalyq mádenıetin qalyptastyrýdy maqsat ettik, – dedi K.Shámshıdınova.
Qazir Shell kompanııasynyń demeýshiligimen iske qosylǵan kún elektr stansalary Nur-Sultan, Aqtaý jáne Oral qalalaryndaǵy Nazarbaev Zııatkerlik mektepterinde jumys istep tur. Al bıylǵy mamyrda Atyraýdaǵy bilim ordasynda kún panelderiniń qurylysy bastalǵan bolatyn. Bul stansa mekteptiń jyldyq energııa shyǵynyn 30 paıyzǵa únemdeýge múmkindik beredi. Mektep oqýshylary kún elektr stansasynyń kómegimen ǵylymı jobalar men zerthanalyq jumystardy júrgizýdi qolǵa almaq.
– Eń bastysy, shákirtterimiz mamandyq tańdaý, jumysqa ornalasý kezinde álemde ekologııa máselesiniń mańyzdy ekenin túsinetin bolady. Sol sebepten, mundaı ınnovasııalyq jobalardy mektepterge engizýdi qolǵa aldyq, – deıdi K.Shámshıdınova.
Kún elektr stansasy mekteptiń stadıonyna ornatyldy. Onyń uzyndyǵy – 73, bıiktigi 4 metrge jetedi. Kún batareıasynyń tirekteri 13 blokqa bólinipti. Munda sporttyq is-sharalar kezinde kórermender úshin eki satyly oryndyq qoıylǵan. Endi mundaı kún elektr stansasynyń qurylysyn Túrkistan qalasyndaǵy Nazarbaev Zııatkerlik mektebinde júrgizý josparlanyp otyr.
Atyraý oblysy
