Berekesi mol saryala kúzdiń shýaqty kúninde Arshaly kentiniń ortalyq alańynda uıymdastyrylǵan jármeńkeden turǵyndar et jáne sút ónimderin, alýan túrli kókónis pen dámi til úıiretin bal tárizdi ónimderdi bazar baǵasynan áldeqaıda arzanǵa satyp aldy. Osy bir qadam dastarhannyń berekesin qashyrmaýǵa sep bolatyn bolsa, ekinshi jaǵynan aýylda turyp, erinbeı eńbek etseń, óziń de osyndaı ıgilikke ıe bolasyń degen ısharany ańǵartyp turǵandaı. Altyn besik – aýyldyń shańyraǵyn bıiktetetin de, bosaǵasyna qut baılaıtyn da adal eńbek. Taýar óndirýshiler tabanaqy, mańdaı terimen ósirgen, jınaǵan azyq-túlikterin kent turǵyndarynyń nazaryna usynýy birlik pen yntymaqtastyqty aıǵaqtap turǵandaı. Buıyrǵan dámdi bólip jegenge ne jetsin. Áıtpese, irgedegi Nur-Sultan qalasynyń saýda sórelerine jetkizse, tutynýshylar pyshaq ústinde talasyp-aq alatyn dúnıe.
Jármeńkege «Agrofırma «Poısk», «Nıkolaevskoe» seriktestikteri men «Ijevskıı» óndiristik kooperatıvi, «Balashov», «Pıtkovskıı» sharýa qojalyqtary tárizdi ujymdar qatysyp, suranysqa ıe azyq-túlik túrlerin saýda sórelerine úıip tastady. Bir aıta keterligi, egde adamdarǵa jeńildikter de qarastyrylǵan.
– Men qaımaǵy alynbaǵan sútten jasalǵan súzbe, qoldyń sary maıyn arzan baǵaǵa satyp aldym, – deıdi kent turǵyny Raıgúl Zakýmbaeva, – bir yńǵaılysy, qajetti azyq-túligińdi izdep, tabanyńnan taýsylmaı, bir jerden alasyń. Onyń ústine bazar baǵasynan áldeqaıda arzan.
Marafon aıasynda óńirde birqatar is-shara ótkizý josparlanyp otyr. Jastar isi ońǵa basqan fermerlermen, sharýasy shalqyǵan sharýa qojalyqtarynyń basshylarymen, eńbegin el elegen sala ozattarymen kezdesýdi josparlaýda. Olardyń is-tájirıbesi aýyl sharýasyna yqylasy aýǵan belsendi jastarǵa baǵdar berýi tıis. «Aýyl – el besigi» áleýmettik jelilerinde sýret baıqaýlary uıymdastyrylyp, bilim berý uıymdarynda ashyq sabaqtar ótkiziledi. Táýelsizdik jyldaryndaǵy aýyl sharýashylyǵy salasyndaǵy jetistikterdi qamtıtyn mazmundy fotokórme de kórermen nazaryna usynylady. Osynyń barlyǵy aýyldaǵy bekem birlik pen baıandy tirliktiń qanshalyqty baǵaly ekendigin qolmen qoıǵandaı etip kórsetýi tıis.
Aqmola oblysy,
Arshaly aýdany
