Aımaqtar • 17 Qazan, 2021

Bir qyzyq ıt júgirtip, ańǵa shyqsa...

128 ret kórsetildi

О́tkeninen ónege izdegen jurt jeti qazynasyn jalyqpaı túgendeýde. Keshegi keńes zamanynda tuqymy tuzdaı qurýǵa shaq qalǵan qazaq tazysynyń baǵy janashyr jandardyń arqasynda qaıta jana bastady.

El táýelsizdigin alǵaly rýhanı qazynanyń júgi jyǵylǵan jyldary kesapat ýaqyt kózin kireýkelegen, tońmoıyn dá­ýir dıdaryn zulmat shymyl­dy­ǵymen tumshalaǵan ha­lyq qazynasy qaıta jań­ǵy­ryp, eńsesin kóterýde. Taıaýda Arshaly aýdanynda respýb­lıkalyq tazy ıtterdiń jarysy uıymdastyryldy. Ja­rystyń ár sátine qaqpan bel, qanshyrdaı qatqan alty tazydan qatysty. Shart boıynsha bir shaqyrym qashyqtyqtaǵy ańdy qaqpaq. Aqyldy kózderi shoqtaı jaınap, ańsyrap turǵan tazylar úshin taban qyzdyrar-aq qashyqtyq. Ilki zamanda qara jerde bes-alty qoıan qaqqan tazy júırik dep baǵalanǵan. Tórt-bes qoıan ilgeni ortashanyń tóńireginde. Sol tazylardyń sarqyty búginde táp-táýir. Jel­men jarysqan júıriktik sarapqa salynyp, alǵyrlyǵy aıqyndalǵan tazylar en da­lanyń shyn júırigi kim eken degendeı jer tanabyn qýyryp, kóz qýantty. Shamdaǵaı eptiligi de, moıyny qatpaǵan ıkemdiligi de joǵalmaǵan eken.

Baǵy janyp, baby kelisken Basar atty tazysy jelden júı­rik jeltaban atanyp, Kók­shetaý qalasynan kelgen ko­mandanyń ókili Baımolla Erǵazy bir qýanyp qaldy. Ekinshi jáne úshin­shi oryndardy Almaty ob­ly­synyń ıtbegileri ıelendi.

Bas júlde de qomaqty. Bolat tuıaǵymen jer tarpyǵan asyl tuqymdy tulpar syıǵa tartyldy. Ekinshi, úshinshi oryndar úshin berilgen syılyq tazy baptaǵan ıtbegiler úshin qanjyǵalaryn maılaıtyn qomaqty olja boldy. Jarysty uıymdastyrýshylardyń biri ASYL QAZYNA ulttyq fede­rasııasynyń múshesi Erdos Kárimqojanyń aıtýyna qa­raǵanda, jaman tumaýǵa baılanysty ótken jyly jarys ótkizil­meı qalypty. Bıyl al­ǵash ret respýblıkalyq deń­geıde uıymdastyrylyp otyr.

– Báseke óte shıelenisti ót­ti. Jarystyń bir jaqsy jeri áriptesterimizben kezdesip, táji­rıbemizdi tolyqtyrdyq, – deıdi ekinshi orynǵa ıe bolǵan Kókjal atty tazynyń ıesi, Alma­ty oblysynyń ókili Sul­tan Isabekov, – tulpar minip, tazy ertken Alash balasy úshin bul erikkenniń ermegi emes, el basyna kún týǵan ashtyq jyldary bir aýyldy bir ıttiń asyraǵany týraly qanshama derekter bar.

Tazynyń ataýynyń ózi taza degen sózden shyqqan deıdi bile­tinder. Saıyn dalanyń kór­ki ispetti júırik ıtti júgir­tip, seıil qu­rýdyń ózi Alash ba­lasynyń mańdaıyna jazylǵan sybaǵa. Qaıta jańǵyrǵan, zul­mat jyldary ıesimen birge qınalǵan jeti qazynanyń biri tekti tuqymyn jaıyp jatsa nesi teris?!

Endigi másele taza qandy tazyny suryptap, baǵzy qalpyna, burynǵy bitimine jetkizý.

 

Sońǵy jańalyqtar

Uqsas jańalyqtar