Sport jańalyqtaryna sholý

Býllıtte basym tústi

Qurlyqtyq hokkeı lıgasynda baq synap jatqan elordanyń «Barysy» kezekti syrt alańdaǵy oıyndar serııasyn jeńispen bastady. Qytaıdyń «Kýnlýn Red Star» klýbymen kez­des­ken jerlesterimiz býllıt serııasynda ústemdik tanytty.

Máskeý oblysyndaǵy «Mytıshı Are­nada» («Kýnlýn» óz aıdynyndaǵy oıyndaryn Reseı jerinde ótkizip jatyr) uıym­dastyrylǵan básekeniń negizgi ýaqyty 1:1 ese­bimen teń aıaqtaldy. Matchtyń birinshi keze­ńinde hokkeıshiler bir-biriniń qaqpasyna gol soǵa almady. Degenmen úzilisten keıin Iýrıı Mıhaılıs shákirtteri muzaıdynda belsen­di qımyldady. Nátıjesinde, oıynnyń 21-mı­nýtynda Olle Alsınnen tamasha pas alǵan Nıkıta Mıhaılıs qarsylas qaqpasyn dál kózdep, komandasyn alǵa shyǵardy.

Úshinshi kezeńde «Kýnlýn» hokkeı­shileri baryn saldy. 58 mınýt boıy Ortıo qorǵaǵan qaqpadan sańlaý taba almaǵan qytaılyqtar matchyń aıaqtalýyna eki mınýt qalǵanda tarazy basyn teńestirip ketti. Shaı­ba avtory – Taıler Vong. Osylaısha negizgi ýaqyt teń aıaqtalǵan soń, kezdesý over­taımǵa ulasty. Biraq bul kezeńde de je­ńimpaz anyqtalǵan joq. Al býllıt serııa­synda «Barys» oıynshylary dáldik tanytty. Qorytyndy esep – 2:1, «Barystyń» paıdasyna. Jerlesterimiz bul jeńisinen keıin «Shy­ǵys» konferensııasyndaǵy týrnır kes­tesinde eki saty joǵarylap, 7-orynǵa turaq­tady.

Jeti kúndegi ekinshi jeńisi

 «Astana» veloklýbynyń qazaqstandyq kóshbasshysy Alekseı Lýsenko bir ap­tanyń ishinde ekinshi márte Italııa tas joldarynda ótken bir kúndik velo­jarystyń jeńimpazy atandy.

О́tken aptada «Koppa Agostonı» dodasynda úzdik shyqqan qazaqstandyq veloshabandoz bul joly Italııanyń soltústik-shyǵysynda tek aq qıyrshyq tas joldar boıymen ótken debıýttik «Serenıssıma Gravel» bir kúndik jarysynda top jardy.

Alekseı Lýsenko 132 shaqyrym qashyq­tyqty 3 saǵat 24 mınýt 14 sekýndta júrip, tuń­ǵysh ret uıymdastyrylǵan jarystyń bas júldesin jeńip aldy. Ekinshi jáne úshinshi oryndardy ıelengen ıtalııalyq Rık­kardo Mınalı men aýstralııalyq Natan Haas jerlesimizden 42 sekýndqa qalyp qoıdy. Sonymen qatar «Astananyń» taǵy eki ókili – Davıde Martınellı (4-oryn) men Samýele Battıstella (9-oryn) úzdik on­dyqtyń qatarynan kórindi.

Fınalda súrindi

Qazaqstannyń birinshi, álemniń 16-raketkasy Elena Rybakına AQSh-tyń Indıan-Ýells qalasynda ótken BNP Paribas Open WTA 1000 týrnıriniń jup­tyq básekesinde reseılik Vero­nıka Kýdermetovamen birge óner kór­se­tip, bas júldege qol sozym jer qal­ǵanda súrindi.

Qazaqstandyq-reseılik jup fınalda belgııalyq Elıze Mertens pen taı­vandyq Se Sý-Veımen kezdesti. 1 saǵat 34 mı­nýt­qa sozylǵan oıynda Rybakına men Ký­der­metova qarsylastarynan 6:7(1:7), 3:6 esebimen jeńilip, ekinshi orynǵa taban tiredi. BNP Paribas Open fınalyna shyqqany úshin Elena men Veronıka 650 reıtıngtik upaı men 220 myń AQSh dollaryn qanjyǵalaryna baılady. Aıta keterligi, bul Rybakına men Kýdermetovanyń birge oınaǵan ekinshi týrnıri. Buǵan deıin olar tamyz aıynda Monrealda (Kanada) ótken jarystyń jartylaı fınalyna deıin jetken edi.

Daıyndaǵan Álı BITО́RE