SKA-ny da býllıtte súrindirdi
Qurlyqtyq hokkeı lıgasynda (QHL) óner kórsetip júrgen Nur-Sultannyń «Barysy» syrt aıdyndaǵy kezekti týr oıynyn Sankt-Peterbýrgtiń SKA ujymymen ótkizip, qatarynan ekinshi jeńisine qol jetkizdi.
Birer kún buryn Qytaıdyń «Kýnlýn Red Star» klýbynan shaıbaly hokkeıdegi penaltıden basym túsken jerlesterimiz keshegi oıynda da sol erlikterin qaıtalady. Sankt-Peterbýrgtegi «Muz saraıynda» 3500-ge jýyq jankúıerdiń qoldaýymen ótken matchtyń negizgi ýaqyty 3:3 esebimen teń aıaqtaldy. Alǵashqy kezeńdi táýir bastaǵan jerlesterimiz kezdesýdiń 6-mınýtynda esep ashty. Darren Dısten pas alǵan Kırıll Savıskıı QHL-daǵy alǵashqy golyn soqty.
Ekinshi kezeńde muzaıdynǵa jınalǵan kórermender bes goldyń kýási boldy. SKA quramynan Valentın Zykov, Anton Býrdasov jáne Emıl Galımov mergendigimen kózge tússe, «Barys» sapynan Nıkıta Mıhaılıs pen Roman Starchenko bir-bir gol soqty. Úshinshi kezeńde tablodaǵy esep ózgerissiz qalyp, kezdesý overtaımǵa ulasty. Bul kezeńde de jeńimpaz anyqtalmaǵan soń, hokkeıshiler býllıt serııasynda baq synady. Onda qarsylastaryna qaraǵanda, dáldik tanytqan «Barys» oıynshylary jeńiske jetti. Endi jerlesterimiz búgin Mınskide «Dınamomen» kezdesedi.
Qazaqstan – úzdik tórttikte
Eýropa fýtbol qaýymdastyǵynyń odaǵy (ÝEFA) fýtzaldan ulttyq quramalardyń jańartylǵan reıtıngin jarııalady.
Úzdikter kóshin jeti dúrkin álem birinshiliginiń jeńimpazy, eki márte Eýropa chempıony atanǵan Ispanııa quramasy bastap tur. Ekinshi orynǵa Reseı quramasy jaıǵasqan bolsa, jýyrda ǵana Lıtvada ótken álem chempıonatynda top jarǵan Portýgalııa reıtıngte úshinshi orynǵa kóterildi.
Al Lıtvada tarıhı nátıje kórsetip, tórtinshi oryn alǵan Qazaqstan quramasy Eýropa reıtınginde de 4-orynǵa turaqtady. Eske sala keteıik, jerlesterimiz jahandyq birinshiliktiń jartylaı fınalynda bolashaq álem chempıondary Portýgalııadan jeńilse, úshinshi oryn úshin ótken básekede álemniń bes dúrkin chempıony Brazılııaǵa ese jibergen edi.
Álem kýbogyna qatysatyndar anyqtaldy
Aldaǵy beısenbi kúni Qytaıda short-trekten 2021/22 jylǵy maýsymnyń shymyldyǵy túriledi. Beıjińdegi Álem kýbogynyń birinshi kezeńi 21-24 qazan aralyǵynda ótedi.
Bıylǵy Álem kýbogynyń kezeńderi 2022 jylǵy Beıjiń Olımpıadasyna irikteý týrnıri sanalady. Sondyqtan barlyq sportshylar úshin bul básekeniń mańyzy zor. Qazaqstannyń Ulttyq Olımpıada komıtetiniń málimeti boıynsha, Álem kýbogynyń birinshi kezeńinde Qazaqstannyń erler quramasynan Abzal Ájiǵalıev, Erkebulan Shamuhanov, Ádil Ǵalıahmetov, Denıs Nıkısha, Mersaıd Jaqsybaev, Nurtilek Qajyǵalı, al qyzdar básekesinde Olga Tıhonova, Mádına Janbosynova, Alena Volkovıskaıa, Iаna Han, Álııa Ámirǵalıeva jáne Ásel Taıshymanova baq synaıdy.
Mádiǵalı Qarsybekov jattyqtyratyn Qazaqstan komandasy búginde Beıjińde sońǵy daıyndyq jumystaryn júrgizip jatyr.
Daıyndaǵan Álı BITО́RE
