Bul týraly brıfıngte Kókshetaýdyń bas memlekettik sanıtarlyq dárigeri Qanat Ysqaqov málim etti.
Kókshetaý qalasynda «Ashyq» jobasyna 800-den astam kásipkerlik nysan qatysady. Jobanyń tıimdiligi koronavırýs ınfeksııasymen aýyratyn naýqastardy jáne úı karantıni rejımin buzǵan, baılanysta bolǵan adamdardy anyqtaýmen rastalady.
«Búgingi tańda «Ashyq» qosymshasynyń kómegimen Kókshetaýda 661 tártip buzýshy anyqtaý múmkin boldy, onyń ishinde 478 adamnyń «qyzyl», 138 adamnyń «sary» mártebesi bar. 235 adam jalpy somasy 8 mln 255 myń 360 teńgege ákimshilik jaýapqa tartyldy», dep túsindirdi Q.Ysqaqov.
Karantın rejımin buzǵan 159 adam Qazaqstannyń ózge óńirleriniń turǵyndary bolyp shyqty. Olar boıynsha sharalar qabyldaý úshin aqparat turǵylyqty jerine jiberildi.
Qalanyń bas memlekettik sanıtarlyq dárigeriniń aıtýynsha, monıtorıngtik toptar Kókshetaýda karantın talaptarynyń buzylýyn anyqtaýdy jalǵastyrýda.
«1 qazannan bastap ártúrli menshik nysanyndaǵy 86 nysan tekserilip, 10 nysannyń qarantın rejımin buzǵany anyqtaldy. Maska rejımin buzǵany úshin tórt nysannyń jaýapty tulǵalary ákimshilik jaýapqa tartyldy. Jumys rejımin buzǵan eki jeke kásipker jazalandy. 50-den astam adamnyń qatysýymen buqaralyq is-sharalar ótkizgen tórt jeke kásipker jaýapqa tartyldy», dep atap ótti oblys ortalyǵynyń bas memlekettik sanıtarlyq dárigeri.
