Densaýlyq saqtaý mınıstrligi synǵa ilikti

Aýyl halqynyń sapaly medısınalyq qyzmetke qoly jetpeı otyr. Bul týraly «Qazaqstan» telearnasy habarlady. Búgin, Parlament Májilisinde ótkizilgen Úkimet saǵatynda «Salamatty Qazaqstan» baǵdarlamasynyń oryndalýy talqylandy. Onda Parlament Májilisiniń Áleýmettik-mádenı damý komıtetiniń tóraıymy Darıǵa Nazarbaeva Densaýlyq saqtaý mınıstrligin synǵa aldy. «Halyq aýrýhanalar men emhanalardyń qoljetimdiligimen qamtylmaı otyr. «100 mektep jáne100 aýrýhana» baǵdarlamasy boıynsha 71 nysan salynsa, sonyń 25-i ǵana aýylda. Qalǵan nysandardy 2016 jyly aıaqtaý josparlanǵan. Degenmen, 13 nysannyń  qurylysy áli bastalmaǵan. Munyń ózi adamdardyń sapaly medısınalyq qyzmetke qoljetimdiligi máselesiniń, ásirese, aýyldyq jerlerde áli sheshimin tappaı otyrǵanyn kórsetedi. Kóptegen aýyldar aýdan ortalyqtarynan qashyqta ornalasqan. Endeshe,  aýa raıynyń qolaısyzdyǵy jaǵdaılaryn, bizdiń joldarymyzdyń jaı-kúıin esepke alsaq, shuǵyl medısınalyq kómekti qajetsinetin kúıge tap bolǵan adamnyń jaı-kúıin kózge elestetýdiń ózi qıyn», - dedi halyq qalaýlysy D.Nazarbaeva. D. Nazarbaeva sóz oraıynda  jekelegen aımaqtardaǵy medısınalyq nysandardyń qondyrǵylarmen tolyq qamtamasyz etilmegenin de alǵa tartty. Jalpy, respýblıkanyń 9 oblysynda quny 834 mln. teńgeni quraıtyn medısınalyq qural-jabdyqtar paıdalanylmaı tur eken. Al Esep komıtetiniń málimetine júginsek, «100 mektep jáne100 aýrýhana» baǵdarlamasyn júzege asyrý barysynda memleketke 1,5 mlrd. teńge shyǵyn kelgen. Ámirhan Almaǵanbetov. Derekkóz: «Qazaqstan» telearnasy. Foto: «24 kz».