Jol bir, júk ortaq

Táýelsiz Qazaqstannyń keden qyzmeti – el aldynda, memleket aldynda zil-batpan mindeti bar sala. Aılasyn asyryp shekaradan ótip, oıdaǵysyn júzege asyramyn degen nebir qýlardy quryqtap júrgenderi belgili. Memleketke keltirgen kiris kólemderi mıllıardtarmen ólshenedi. Mańǵystaý aımaǵynda keden­shiler belsendi qyzmet etýde. Memlekettiń eko­nomıkalyq múdde­lerin qamtamasyz etý isinde mańyzdy rólge ıe ekendikterin, syrt­qy ekonomıkalyq baılanysty  retteý­ge qatysý arqyly qyzmet túrlerin júzege asyryp, memleket bıýdjetin toltyrýǵa jáne  ekonomıkalyq máselelerdi sheshý­ge atsalysýǵa, kedendik jáne ózge de sala­daǵy quqyq buzýshylyqtar men qyl­mys­tardy anyqtap, olardyń jolyn kesýge tıis ekendigin jaqsy uǵynatyn olar memleket shyn máninde syrtqy ekonomıkalyq derbestikke jáne táýel­siz­dikke qol jetkizgisi kelse, eń aldymen myqty kedeni bolýy tıis degen qaǵı­dany basshylyqqa alyp keledi. Osy jaýap­kershilik olardyń teńiz arqyly kelgen talaı brakonerlerdi aýyzdyqtap, zańsyz taýarlardy tárkileýine negiz boldy. Zamannyń yrǵaǵy men ekonomıkalyq qarym-qatynas keden qyzmetine qoıylar talapty kúsheıte túsedi. Memleket basshysy keden qyzmetiniń sapasyn ilgerilete túsý týraly bıylǵy Joldaýynda aıtqan bolatyn. Jýyrda Mańǵystaý oblysy boıynsha kedendik baqylaý departamenti qyzmetkerleri jıylyp, Joldaýǵa qoldaý bildirdi. Memleket basshysynyń Joldaýda eli­mizdiń ómir súrýi boıynsha naqty baǵdarlar, mindetter jáne prınsıpter aıqyndaldy, bul sapaly qadam jasaýǵa múmkindik beretini sózsiz jáne respýblıkamyz 2050 jyly álemniń eń damyǵan otyz eliniń quramyna enýi tıis, degen Mańǵystaý oblysy boıynsha kedendik baqylaý departamenti bastyǵynyń m.a. S. Dynbaev keden zańdylyqtaryn ymyrashyldandyrý men júıelendirý, ákimshilik basqarýǵa qatysty Memleket basshysy qoıǵan bıik maqsattarǵa jetý úshin Joldaýmen qarýlanyp jumylý keden salasy qyzmetkerleriniń negizgi mindetteri ekenin atap ótti. Júkterdi kedendik óńdeý merzimin qys­qartý, shekaradan ótetin joldardyń ótkizý múmkindigin arttyrý, eksporttyq-ımporttyq operasııalardyń rásimderin ońaılatý, sybaılas jemqorlyqqa qarsy sharalardy kúsheıtý, jumystyń aıqyndyǵyn arttyrý jáne memlekettik qyzmet kórsetýlerdiń sapasyn joǵa­rylatý, bıznes-qoǵamdastyqpen ózara is-qımyldyń yńǵaıly júıesin qamtamasyz etý máselelerine toqtaldy. Keden qyzmetiniń jeke quramy aldynda bólimder basshylary sóz alyp, Joldaýdyń basym baǵyttary týraly oı órbitti. «Júrer jolymyz, barar bolashaǵymyz bir, sondyqtan kóterer júk ortaq» degen kedenshiler  Joldaýda aıtylǵan tapsyrmalardy oryndaýǵa belsendi atsalysatyndaryn aıtyp otyr. Gúlaıym ShYNTEMIRQYZY, «Egemen Qazaqstan». Mańǵystaý oblysy.