Kıevten kelgen arnaıy bort QR Qorǵanys mınıstrligi 19232 áskerı bólimine keshki saǵat 19:00-de kelip qondy. Qazaqstandyq sarbazdyń qurmetine oraı Qurmet qaraýyl rotasy sap túzep, áskerı orkestr elimizdiń ánuranyn oryndady. Erlik jolynda qaza tapqan jaýyngerdi qarsy alý saltanatyna Qorǵanys mınıstrligi, Ulttyq ulan sardarlary, «Atamnyń amanaty» qoǵamdyq birlestigi jáne áskerı bólim basshylyǵy men jeke quramy qatysty.
«Atamnyń amanaty» qoǵamdyq birlestigi álemdik pandemııaǵa qaramastan bıyl toǵyz otandasymyzdyń súıegin týǵan jerine alyp kelýdi iske asyrdy.
«Ýkraınadan Uly Otan soǵysynda qaza tapqan qazaqstandyq sarbazdyń súıegin alǵash ret jetkizip otyrmyz. Osy ıgilikti iske kómektesken «Plasdarm» izdeý tobyna aǵysymyzdy bildiremiz. Olar sarbazdyń súıegin taýyp, aty-jónin anyqtap, kóp jumys atqardy. Sondaı-aq, Qazaqstan Respýblıkasynyń Ýkraınadaǵy elshiligine, ushaqpen kómektesken Ulttyq ulan basshylyǵyna, jaýyngerdiń súıegin saltanatty túrde qarsy alýǵa atsalysqan Qorǵanys mınıstrligine úlken alǵys aıtamyz. Bul jumys erlik týraly estelikterdi saqtaýǵa, urpaq tárbıesine óte qajet dep bilemiz», dedi «Atamnyń amanaty» qoǵamdyq birlestigi basqarmasynyń tóraǵasy Murat Moldaǵalıev.
Qazaqstandyq sarbaz О́ksikbaı Bozarbaev qan maıdanǵa Túrkistan oblysy Alǵabas aýylynan attanǵan. Stalıngrad shaıqasynda erlik kórsetip, birneshe márte jaraqat alyp, birqatar medaldarmen marapattalǵan. Ol Ýkraına eliniń Donesk óńirinde oryn alǵan shaıqasta erlikpen qaza tapty. Alǵabas aýylynda О́ksikbaevtan taraǵan nemereleri turady. Murat Janataıulynyń aıtýynsha, qazaqstandyq jaýyngerdi Qorǵanys mınıstrliginiń arnaıy bortymen týǵan aýylyna jetkizý josparlanǵan. Sarbazdy týǵan urpaqtary, Túrkistan oblystyq ákimdigi men qoǵamdyq uıymdar ókilderi qarsy alyp, týǵan jerdiń topyraǵyna tapsyrady.
