Qoǵam • 27 Qazan, 2021

Sheneýnikter «gıgantomanııadan» qashan aıyǵady?

176 ret kórsetildi

Budan birer jyl buryn jolymyz túsip, Rım qalasynda bolǵanymyzda ıtalııalyqtardyń únemshildigine qaıran qalǵanbyz. Máselen, jylyna jer-jahannan mıllıondaǵan týrıst keletin kóne de ǵajaıyp qalanyń ertede kespetas tóselgen alańdarynyń ýaqyt óte kele sál ǵana sáni taıǵan tustaryn biz sııaqty, «qonaqtardan uıat bolady» dep aýystyra bermeıdi eken.

Osyndaı usaq-túıek jaılarǵa da nazar aýdaryp, «búkil jol bastap aparatyn shahardyń» keremet kórkine kóz salyp otyrǵanymyzda, óz elimizdegi Abaı babamyz synap aıtyp ketken «bes dushpannyń» biri – «beker mal shashpaqtyń» keıbir keleńsiz kórinisi oıymyzǵa oralǵan. Naqty aıtqanda, osy ǵasyrdyń bas kezinde Petropavl qala­synyń kóshelerindegi keńes zamanynda granıtten kesip ornatylǵan, keı tusta ǵana shamaly mújilińkiregen jıektastaryn túgel qazyp alyp, avtomashınalarǵa tıep, belgisiz bir jaqqa áketip, olardy qum men sementten quıylǵan jańalarymen almastyrǵanda qalalyqtardyń bastaryn shaıqap, qynjylys bildirgeni esime tústi. Olar: «Qaladaǵy basqa máseleniń bári she­shilip bitip qalǵandaı, kóshemizdiń qymbat granıt jıektastaryn arzanqol birdeńemen jappaı aýystyrýdyń qandaı qajeti bar? Bul da baıaǵy «gıgantomanııanyń» bir kórinisi emes pe?!. Jergilikti basshylar muny qazy­nanyń aqshasyn qymqyryp-jymqyrý úshin oılap tapqan bolar...» desken. «Jaman ádet tez juǵady» demekshi, sol kezde basqa keıbir óńirlerde de jıektastardy aýystyrý naýqany qyzý júrgizilip, onyń bastamashysy bolǵan ákimderge jergilikti jurt neshe túrli aıdar taǵyp, syn sadaǵymen túırep jatty...

Bertinde Soltústik Qazaqstan oblysynyń shalǵaıdaǵy Ǵabıt Músirepov atyndaǵy aýdanynda bolǵanymyzda, jergilikti turǵyndar Toqsan bı jáne Drýjba aýyldarynyń arasyndaǵy respýblıkalyq mańyzy bar avtomobıl jolynyń nasharlyǵynan qıyndyq kórip otyrǵandyqtaryn aıtqan edi. Uzyndyǵy 53 kılometr jol ýchaskesi apatty jaǵdaıda bolǵandyqtan, onda jol-kólik oqıǵalary jıi bolyp turady eken. Al oǵan júrgizilgen aǵymdaǵy jóndeý jumystary durys nátıje bermeı, búginde kádimgi greıder jolǵa aınalǵan. Osy jóninde aýdannyń sol kezdegi ákimi Aǵzam Tastemirovpen sóı­leskenimizde, ol turǵyndardyń shaǵymy oryndy ekenin, atalǵan jol ýchaskesin kúrdeli jóndeýden ótkizý úshin Parlament depýtattaryna da júgingenin aıtty. Soǵan oraı, Indýstrııa jáne ınfraqurylymdyq damý mınıstrliginen kelgen jazbasha jaýapta: «Qarajattyń shekteýligine baılanysty osy avtojol salynǵan ýaqyttan beri onyń asfalt jamylǵysyn aýystyrý jumystary júrgizilgen joq jáne búginde oǵan rekonstrýksııa jasaý qajet. Osyǵan baılanysty, «Jezqazǵan – Petropavl» avtojolynyń sapasyn jaqsartý maqsatynda 2025 jylǵa deıingi «Nurly jol» memlekettik baǵdarlamasy aıasynda atalǵan joldy tolyq rekonstrýksııalaý josparlanyp otyr. Oǵan deıin osy joldyń tehnıkalyq jaı-kúıi kútip-ustaý jumystary arqyly saqtalatyn bolady», delinipti.

Mınıstrliktiń jaýabyn oqyp otyr­ǵanymyzda qazekemniń «Jany ashymas­tyń qasynda basyń aýyrmasyn» degen sózi oıymyzǵa oraldy. Ondaǵy sheneýnikter de bir kezde paıda bolǵan «gıgantomanııa» dertin juqtyryp alyp, sodan áli aıyǵa almaı júrgen tárizdi. Áıtpese, uzyndyǵy 1100 kılometrden asatyn «Jezqazǵan – Petropavl» avtomobıl jolyn túgeldeı rekonstrýksııalap shyǵý úshin mıllıardtaǵan teńge qarajattyń bólinýin kútip, alaqan jaıyp otyrýda qandaı qısyn bar? Bul joldyń avtokólik júrýge jaramdy tustaryn jóndeýdi keıinge qaldyryp, áýeli Toqsan bı men Drýjba aýyldary arasyndaǵy 53 kılometrlik jol ýchaskesin rekonstrýksııadan nege ótkizbeske? Álde sheneýnik shirkinder uzyn joldy osylaı kezeń-kezeńmen jóndeý úshin respýblıkalyq bıýdjetten jyl saıyn shamalap qarjy suraýdy uıat sanap, bet monshaqtary úzilip tur ma eken? Astananyń taqtaıdaı tegis jolymen taıpala jyljyǵan kólik ishinde kóńildi mýzyka tyńdap kele jatatyn olardyń qulaǵyna shalǵaıdaǵy aýyldar turǵyndarynyń ja­naıqaıy jetpeı jatqany anyq. Olar Memleket basshysynyń «Azamattardyń barlyq syndarly ótinish-tilekterin jedel ári tıimdi qarastyratyn «Halyq únine qulaq asatyn memleket» tujyrymdamasyn iske asyrý – bárimizge ortaq mindet», degen sózin estimegen sııaqty ma, qalaı?..

Sońǵy jańalyqtar

Hattonnyń uly Attılany atynan túsirdi

Kásipqoı boks • Búgin, 10:35

Jekpe-jeksiz ótken alǵashqy jyl

Kásipqoı boks • Búgin, 09:08

«Dınamodan» jeńildi

Hokkeı • Búgin, 07:34

Kreatıvti kitap dúkeni

Aımaqtar • Búgin, 07:33

Janbota jarap tur

Sport • Búgin, 07:27

Aqyn tutynǵan kese

Tarıh • Búgin, 07:24

Jekpe-jek keıinge shegerildi

Boks • Búgin, 07:22

Bes belestiń bıigin baǵyndyrǵan...

Qoǵam • Búgin, 00:44

Uly Jambyl murasy ulyqtaldy

Rýhanııat • Búgin, 00:33

Uqsas jańalyqtar