Shara Halyqaralyq Túrki akademııasynyń jańa ǵımaratynda uıymdastyryldy.
Túbi bir týysqan túrki halyqtardyń tarıhy, tili, ádebıeti, qazynaly murasynyń zerttelýine, zaman talabyna saı jańǵyrýyna úlken úles qosyp kele jatqan akademııa jańa ǵylymı eńbektiń shyǵýyna muryndyq bolǵan. Memlekettik hatshy óz sózinde bul jınaq – shejireli tarıhymyzdy túgendep, týysqandyq júıemizdi zerdelegen tolymdy týyndy ekenin atap ótti.
«Bul eńbek el shejiresi men jer shejiresiniń úndestigin aıshyqtaýymen, qasıetti jerimizdiń aýmaqtyq tutastyǵy el-jurtymyzben kindiktes ekenin aıǵaqtaýymen, ulttyq qaýipsizdigimiz ben memlekettik múddemizge rýhanı qorǵan qyzmetin atqarýymen asa qundy», dedi Qyrymbek Kósherbaev.
Irgeli zertteý QR Prezıdenti Qasym-Jomart Toqaevtyń alǵysózimen, qazaq, orys, túrik, aǵylshyn tilderinde jaryqqa shyqty. Munda jurtymyzdyń bes myń jyldyq násildik teginiń ulanǵaıyr dalamen tyǵyz sabaqtastyqta ekendigin dáleldeıtin ǵylymı dáıekter keltirilgen. Sondaı-aq halqymyzdyń násildik jelisin, týysqandyq órisin keshendi saralaǵan ǵylymı eńbekte, baýyrlas elderdiń atatek tarıhy, týysqandyq baılanystary jaıynda tyń derekter de bar.
