Áleýmettik jelide keı turǵyndar ekinshi kúnnen beri jaryqsyz otyrǵandaryn aıtyp shaǵymdandy. Elektr qýaty Petropavldyń 19-shy, Benzostroı, Hromzaýyt yqsham aýdandarynda, Jumysshy kentinde ǵana emes, oblystyń taǵy birneshe eldi mekeninde sóndirilgen. Keıbiri tańerteńgi saǵat 10.00-den beri jaryqsyz otyrǵandaryn jazdy.
«SevKazEnergo» AQ baspasóz qyzmetiniń málimetinshe, 1 qarasha kúni Petropavl 2-JEO úsh qazandyq agregaty isten shyqty. Saldarynan stansadaǵy júkteme tómendep ketken. Qýat tapshylyǵy týyndap, saldarynan nysandardy elektr energııasynan ajyratýǵa týra keldi. Qalyptasqan jaǵdaıdy retteý úshin júıelik operator kásiporyndy oqshaýlanǵan jumysqa shyǵarýǵa buıryq berdi. О́ńirdiń 5 aýdany - M.Jumabaev, Mamlıýt, Esil, Jambyl jáne Shal aqyn aýdandarynyń eldi mekenderi ishinara jaryqsyz qaldy. Qazirgi ýaqytta Petropavl 2-JEO stansa jumysyn qalypqa keltirý maqsatynda táýlik boıy jóndeý jumystaryn júrgizip jatyr.
«Soltústik Qazaqstan REK» AQ júıelik operatorynyń komandasy boıynsha 20 mınýt ishinde 30 MVt júkteme alynyp tastalady. Saldarynan Tımırıazev jáne Jambyl aýdandarynda elektrmen jabdyqtaý shekteledi. Sondaı-aq Esil, Aqqaıyń, Qyzyljar aýdandary men M.Jumabaev aýdandarynda jaryq joq. Petropavlda Jumysshy kentiniń tutynýshylary, Músirepov jáne Áýezov kósheleriniń turǵyndary, ishinara Maloe Beloe eldi mekeni, Benzostroı jáne Hromzavod shaǵyn aýdandary, sondaı-aq 19 shaǵyn aýdan tutynýshylarynyń bir bóligi elektr qýatynsyz otyr. Bul jaǵdaı qalalyq jylý jelileriniń jumysyna da áser etti. Jylý-elektr stansasynan shyǵatyn ystyq sýdyń temperatýrasy 3-5 %-ǵa tómendep, jylytý júıesine de áser etti.
Energetıkter kásiporyn jumysyn qalypqa keltirý úshin tıisti is-sharalardy qolǵa aldy.
