«Kómirtegi beıtaraptyǵyna jer men sýdy paıdalanýdyń ornyqtylyǵyn, ekonomıkanyń energetıkalyq tıimdiligin arttyrý, elektrlendirý, ekologııalyq taza jáne jańartylatyn energııa kózderin keńinen paıdalaný arqyly qol jetkiziledi. Parnıktik gaz shyǵarýdy azaıtý josparlaryn iske asyrý kezinde naryqtyq mehanızmder men jeke ınvestısııalar áleýeti barynsha paıdalanylady», dedi Premer-Mınıstr Úkimet otyrysynda.
Budan bólek, Qazaqstan Orman jáne jer paıdalaný jónindegi deklarasııaǵa, Jastarǵa bilim berý jáne tartý mindettemesine qosyldy.
«Qazirgi kezde Aral ekologııasyn jaqsartý jumystary aıasynda teńiz túbine 1,1 mln gektar jerge sekseýil otyrǵyzý jumystary jalǵasýda. Kelesi jyldan bastap alty qalada – Nur-Sultan, Almaty, О́skemen, Shymkent, Aqtóbe jáne Qaraǵandy qoqys óńdeıtin zaýyt salý jobasyn iske asyrý bastalady. «Jasyl Qazaqstan» ulttyq jobasy da atmosferalyq aýanyń sapasyn jaqsartýǵa, qaldyqtardy basqarý júıesin jetildirýge, eldegi sý resýrstarynyń ekojúıesin, bıoalýantúrlilikti saqtaýǵa jáne erekshe qorǵalatyn tabıǵı aýmaqtardy damytýǵa baǵyttalǵan», dedi Asqar Mamın.
Qazirgi ýaqytta ákimdikter Ekologııalyq jaǵdaıdy jaqsartý jónindegi jol kartalaryn iske asyrýda.
«2021 jylǵa kózdelgen is-sharalardyń 62%-y ǵana oryndaldy. Eń tómen kórsetkishter – Batys Qazaqstan, Pavlodar, Atyraý oblystary men Shymkent qalasynda. Sondyqtan ákimdikterge osy baǵyttaǵy jumysty jandandyrýǵa jáne josparlanǵan barlyq is-sharalardyń oryndalýyn qamtamasyz etýdi tapsyramyn», dedi Asqar Mamın.
