Jataqhanadaǵy oryn tapshylyǵy máselesi barlyq óńirler úshin ózekti. Statıstıkalyq málimetterge súıensek, respýblıka boıynsha jataqhanaǵa muqtaj stýdentter sany 62 myńnan asady. Jataqhanaǵa negizgi suranys Almatyda – 22 myń oryn jáne Nur-Sultanda – 17 myń oryn. QR BǴM «Qarjy ortalyǵy» AQ baspasóz qyzmetiniń málimetinshe, 2021 jyldan bastap mektep bitirýshiler sanynyń aıtarlyqtaı óskeni baıqalady.
Máselen, bıyl 163 myńnan astam adam mektep bitirse, 2025 jylǵa qaraı bul kórsetkish 302 myńǵa jetýi múmkin. Bul máseleni sheshý úshin árbir zańdy tulǵa (memlekettik mekemelerdi qospaǵanda) stýdentterge arnalǵan jataqhana salyp, tabys ala alatyn mehanızm ázirlendi.
Máselen, jobaǵa qatysýǵa nıet bildirgen qurylys salýshy óz qarajatyna nysan salyp, 8 jyl ishinde paıdalanýǵa berilgennen keıin árbir naqty alǵan tósek oryn úshin memleketten tólem alady. Memlekettik tapsyrys boıynsha tólemderden bólek, ınvestordyń ózi árbir stýdent turý úshin ortasha eseppen 15-20 myń teńge tólem alady (quny óz betinshe anyqtalady).
Sondaı-aq ınvestor úshin «Qarapaıym zattar ekonomıkasy» jáne «Bıznestiń jol kartasy 2020-2025» («Damý» qory) sheńberinde 9%-ǵa deıingi banktik nesıeni sýbsıdııalaý jáne daıyn jobalyq-smetalyq qujattamany usyný (standartty jáne jeke jobalar) sııaqty qosymsha múmkindikter qarastyrylǵan.
«Sondaı-aq ınvestor kommersııalyq keńistikten qosymsha tabys ala alady, ıaǵnı jataqhana bazasynda ashana, shashtaraz jáne basqa da sharýashylyq nysandaryn ashýǵa bolady», delingen habarlamada.
