Qoldanystaǵy zańnamaǵa sáıkes, sottalǵandarǵa qatysty sot úkimimen belgili bir oryndarǵa barýǵa, ıaǵnı oqý oryndaryna jaqyndaýǵa, túngi ýaqytta úıden shyǵýǵa, probasııa qyzmetine habarlamaı, turǵylyqty jerinen tys jerlerge shyǵýǵa tyıym salý sııaqty shekteýler qoıylýy múmkin.
«Probasııa qyzmetiniń ınspektory sottalǵandardyń belgilengen talaptardy naqty ýaqytta da, ótken kezeń úshin de saqtaýyn qadaǵalaı alady. Qyzmetker qajetti derekterdi kompıýterdiń, planshettiń nemese smartfonnyń kómegimen jeke kabınet arqyly teksere alady. Eger sottalǵan adam belgilengen shekteýlerdi buzsa nemese bilezikti zaqymdaýǵa tyryssa, buzýshylyq týraly belgi dereý túsedi.
Belgilengen tyıym salýlardy buzý, elektrondy baqylaý quraldaryn qoldanýdan bas tartý nemese jabdyqty búldirý anyqtalǵan kezde probasııa qyzmeti ony bas bostandyǵynan aıyrý týraly máseleni qaraý úshin materıaldardy sotqa jiberedi», delingen vedomstvo habarlamasynda.
Mınıstrliktiń habaralýynsha bul jańalyq qylmystyq-atqarý júıesin jańǵyrtý aıasynda engizilýde. Esepke alynǵan adamdardy qashyqtyqtan baqylaý quraldary (planshetter, elektrondy bilezikter) sottalǵandardyń qaıta qylmys jasaý táýekelderin barynsha azaıtýǵa múmkindik beredi jáne probasııa qyzmetiniń baqylaý sapasyn jaqsartady.
«Eń aldymen, bilezikter sottalǵandarǵa, jynystyq tıispeýshilikke qarsy qylmystar úshin jáne jazany óteý sharttaryn únemi buzatyndarǵa qoldanylady. Qalǵan sottalǵandar úshin mobıldi qurylǵylarda arnaıy qosymshany paıdalaný kózdeledi. Qajetti jabdyq jaldaý negizinde paıdalanylady, bul qyzmet kórsetý shyǵyndaryn edáýir azaıtady.
Kelesi jyldan bastap probasııa qyzmetiniń esebinde turǵandardyń bárine elektrondy baqylaý quraldaryn qoldaný praktıkasyn keńeıtý josparlanyp otyr. Barlyǵy 2,5 myńǵa jýyq elektrondy bilezik pen 25 myńnan astam mobıldi qurylǵy qajet», dep jazdy Ishki ister mınıstrligi.
