Golovkın-Mýrata arasyndaǵy jekpe-jek buǵan deıin túrli BAQ-ta jeltoqsanda ótedi dep habarlanǵanymen, boksshylardyń ózderi, olardyń promoýterleri, tipti kezdesýdi tikeleı efırde usynatyn DAZN platformasy da resmı málimdemegen edi. Degenmen ótken aptanyń sońynda eki boksshy da ózderiniń áleýmettik jelidegi paraqshalarynda aıqastyń naqty ýaqyty men ótetin jerin jankúıerlerge jarııalady.
Jekpe-jek resmı habarlanǵan kúni eki bylǵary qolǵap sheberi ózderiniń aldaǵy kezdesý týraly oılaryn ortaǵa saldy.
Gennadıı Golovkın: «Japonııadaǵy jankúıerlerime kezekti Big Drama Show-dy usynatynyma qýanyshtymyn. Bul elde boks óte tanymal sport túri sanalady. Mýrata – myqty chempıon. Bul – eki boksshy úshin de keremet boks keshi bolady dep úmittenemin. О́ıtkeni ortaǵa ekeýmizdiń de chempıondyq beldigimiz báske tigiledi. Boks jankúıerlerine tamasha jekpe-jek usynamyz».
Rıota Mýrata: «Meniń áýesqoı jáne kásipqoı boksta ótkizgen jekpe-jekterimniń bári Gennadıı Golovkınmen bolatyn aıqasqa deıingi daıyndyq jumystary boldy dep esepteımin. Sebebi, dál osy kezdesý meniń orta salmaq pen boks tarıhyndaǵy ornymdy aıqyndap bermek. Golovkın – uzaq ýaqyt orta salmaqtyń kóshin ustaǵan tájirıbeli boksshy. Men úshin ol áli jeńilgen joq. Oǵan degen qurmetim erekshe.
Pandemııa saldarynan eń keıingi aıqasymdy osydan eki jyl buryn ótkizdim. Biraq maǵan bul eki jyldyq úzilis jemisti boldy. Osy ýaqyt aralyǵynda fızıkalyq jaǵdaıym men soqqymnyń kúshin arttyryp, bapkerlermen qarqyndy jattyǵý ótkizdik. Osyndaı aıqas Japonııada ótetinine qýanyshtymyn. Men úshin bul – úlken qurmet».
Gennadıı Golovkın keıingi jekpe-jegin byltyrǵy jeltoqsanda polshalyq Kamıl Sheremetamen ótkizgen bolatyn. AQSh-tyń Florıda shtatyndaǵy Seminole Hard Rock Hotel & Casino arenasynda uıymdastyrylǵan aıqasta otandasymyz qarsylasyn jetinshi raýndta tehnıkalyq nokaýtpen jeńgen edi.
Al Rıota Mýrata bolsa, sońǵy ret sharshy alańǵa 2019 jyldyń jeltoqsanynda kóterildi. Sol jyly ol kanadalyq Stıven Batlermen (28-1-1) óz elinde judyryqtasyp, besinshi raýndta tehnıkalyq nokaýtpen basym túsken.
