Aımaqtar • 16 Qarasha, 2021

Jas arhıvshiler jarysty

264 ret kórsetildi

Oral qalasynda Qazaqstan Respýblıkasynyń memlekettik jáne vedomstvolyq arhıvter arasyndaǵy IV Respýblıkalyq jas arhıvshiler onlaın baıqaýy ótti. El táýelsizdiginiń 30 jyldyǵyna arnalǵan baıqaýǵa Qazaqstannyń ár aımaǵynan 7 komanda qatysty, dep jazady Egemen.kz.

Elimizdiń jas arhıvshiler baıqaýy osymen tórtinshi márte uıymdastyrylyp otyr. Bul sharanyń basty maqsaty – jas mamandardyń kásibı biliktiligin arttyrý, arhıv qujattarynyń qundylyǵyn dáripteý, «Rýhanı jańǵyrý» baǵdarlamasy aıasynda arhıv salasynyń rólin, arhıvshi mamandyǵynyń mártebesin kóterý jáne jastar arasynda arhıv salasynyń mańyzdylyǵyn túsindirý eken. Oral qalasynda uıymdastyrylǵan onlaın-baıqaýǵa qazylar alqasy qatarynda qatysyp, jas arhıvshilerdiń tartysty saıysyna kýá boldyq.

Aıta keteıik, pandemııa saldarynan alǵash ret onlaın formatynda ótken bul baıqaýdy Batys Qazaqstan oblysynyń memlekettik arhıvi men Qazaqstan Respýblıkasy Prezıdenti Arhıvi birlese uıymdastyrdy. Batys Qazaqstan oblysy ákimdigi erekshe  qoldaý kórsetti. Baıqaýdyń ashylý saltanatyna Batys Qazaqstan oblysy ákiminiń orynbasary Baqytjan Narymbetov qatysyp, quttyqtaý sóz sóıledi. Sondaı-aq Oral qalasyna Qazaqstan Respýblıkasy Mádenıet jáne sport mınıstirligi Arhıv isteri jáne qujattamany basqarý komıteti tóraǵasynyń orynbasary Baǵdat Tanysbekov pen Qazaqstan Respýblıkasy Prezıdenti arhıviniń dırektory Jámılá Ábdiqadyrova arnaıy keldi.

Tartysty básekege Almaty qalasy memlekettik arhıviniń «Vernyı» komandasy, Aqtóbe oblysy memlekettik arhıviniń «Amanat» komandasy, Atyraý oblysy memlekettik arhıviniń «Munaıly Astana» komandasy, Jambyl oblysynyń memlekettik arhıviniń «Taraz ǵıbraty» komandasy, Jezqazǵan qalasy memlekettik arhıviniń «Táýelsizdik tumary» komandasy, Soltústik Qazaqstan oblysy memlekettik arhıviniń «Qyzyljar qyrandary» komandasy, Qazaqstan Respýblıkasy Prezıdenti arhıviniń «Qyran» komandasy qatysty.

Baıqaý onlaın formatta ótkendikten, negizgi kúsh tehnıkalyq múmkindikterge, kreatıvti ıdeıalarǵa tústi. Konkýrs shartyndaǵy «komandanyń ózin tanystyrýy», «Táýelsizdik jyldaryndaǵy meniń arhıvimniń jetistikteri» týry, «Táýelsizdik - máńgilik eldiń tuǵyry» atty shyǵarmashylyq týr óte qyzyqty boldy. Ár komanda daıyndaǵan beınerolıkter kórkemdik dárejesi joǵary shyǵarma dárejesine jetip jatty. Mysaly, «Qyzyljar qyrandary» tobynyń patrıottyq rýhy, «Vernyı» komandasynyń jańashyldyǵy, «Taraz ǵıbraty» tobynyń dástúrshildigi unady. «Amanat» toby Álııa Moldaǵulova haqynda kórkemdik elementteri mol beınefılm jasaǵan eken. Al jezqazǵandyq «Táýelsizdik tumary» komandasy barlyq týrda da erekshe daıyndyǵymen, shyǵarmashyl tapqyrlyqtarymen kózge tústi. Oblys ortalyǵy emes, aýdandyq deńgeıdegi ujymnyń atyshýly áriptesterinen esh qalyspaı óner kórsetkenine jıýrı músheleri rıza bolyp qol soqty.

Respýblıkalyq jas arhıvshiler baıqaýynyń 2-týry test synaǵy edi. Bul týrda qatysýshylarǵa Qazaqstan Respýblıkasyndaǵy arhıv salasyna qatysty zańnamalar, arhıv mekemeleri jumysynyń normatıvteri men reglamenti boıynsha 30 test suraǵy berildi. Komandalar 20 mınýt ishinde bergen jaýap nátıjelerine qaraı baǵalandy. Bul satyda 30 saýaldyń 24-ne durys jaýap bergen «Qyran» komandasy top bastady. Aldyn ala daıyndalyp, taspaǵa túsirilgen ózge týrlarǵa qaraǵanda, bul saıys shynaıy synaq bolǵany anyq. Nátıjesinde IV baıqaýdyń bas júldegerin de anyqtaýǵa osy sep boldy.

Sonymen, IV Respýblıkalyq Jas arhıvshiler baıqaýynyń bas júldesin Qazaqstan Respýblıkasy Prezıdenti arhıviniń «Qyran» komandasy jeńip aldy. Shyny kerek, elimiz boıynsha aldyńǵy qatarly muraǵat ujymynyń bul jetistigi zańdy da. Respýblıkadaǵy arhıv qyzmetiniń kóshbasshy týyn ustaǵan ujymda laıyqty izbasar jastar ósip keledi eken.

- Búgingi baıqaýdyń I oryn júldesine Jezqazǵan qalasy memlekettik arhıviniń «Táýelsizdik tumary» komandasyn laıyq dep taptyq. Baıqaýdyń baǵaly syılyǵy, altyn medali men sertıfıkaty kıeli Ulytaý óńirine joldanady. Sonymen birge, 2023 jyly ótetin V Respýblıkalyq Jas arhıvshiler baıqaýyn ótkizý qurmetti mártebesi de Qaraǵandy oblysyna beriledi, - dep jarııalady Qazaqstan Respýblıkasy Mádenıet jáne sport mınıstirligi Arhıv isteri jáne qujattamany basqarý komıteti tóraǵasynyń orynbasary Baǵdat Tanysbekov.

Oralda ótken baıqaýdyń ekinshi-úshinshi júldelerin «Taraz ǵıbraty» men «Vernyı» komandalary bólisti. Olardyń bári baıqaýdyń baǵaly syılyqtarymen marapattaldy. Al Soltústik Qazaqstan, Atyraý, Aqtóbe oblysy komandalary alǵys hatqa ıe boldy.

Árıne, ótkeni joq el, tarıhy joq halyq bolmaıdy. Tarıh qoınaýyna tereńdep engen árbir ǵasyrdyń, árbir kezeńniń aıtýly oqıǵalary, jylnamasy arhıv qorlarynda jatyr. Halyqtyń qujattyq jadyn óskeleń urpaq úshin saqtap otyrǵan Qazaqstan arhıvteriniń róli óte zor. Elimizde ár jyldary qolǵa alynǵan «Mádenı mura», «Rýhanı jańǵyrý», «Arhıv-2025» baǵdarlamalary, Elbasynyń «Uly dalanyń jeti qyry», Prezıdentimizdiń «Táýelsizdik bárinen qymbat» maqalalarynda aıtylǵan mindetter, tipti dál qazir qolǵa alynǵan repressııa qurbandaryn tolyq aqtaý boıynsha qurylǵan komıssııalar qyzmeti de arhıvsiz esh júzege aspas edi. Arhıv ujymdary da qujattardy sandyq jetkizgishterge aýdaryp, ǵylymı-anyqtamalyq apparat pen arhıv qorlarynyń avtomattandyrylǵan derekqoryn quryp, memlekettik organdarda «Elektrondy qujattar qoımasy» servıstik baǵdarlamalyq ónimi engizilip, zaman talabyna saı damyp keledi. Arhıv salasy qyzmetkerleriniń jalaqysy da kóterilip, muraǵatshy degen mártebeli mamandyqqa aınaldy. Oraldyq ardager Vıacheslav Inochkınniń aıtýynsha, osydan otyz jyl burynǵy arhıv pen qazirgi muraǵattardyń arasy jer men kókteı, salystyrýǵa kelmeıdi. Bul úrdis toqtamaýy tıis, árdaıym alǵa damýy kerek. Sondyqtan da elimizde eki jyl saıyn dástúrli túrde ótip kele jatqan jas arhıvshiler baıqaýy jańa býyn mamandarǵa erekshe stımýl bereri anyq.

1

 

Sońǵy jańalyqtar

Shabyt shaqyratyn shahar

Elorda • Keshe

Aqjaınaq astana

Elorda • Keshe

Ozyq óndiris ornynda boldy

Aımaqtar • Keshe

Dımash pen Djekson

О́ner • Keshe

Uqsas jańalyqtar