«Barys» oıynshylary Sochıde uıymdastyrylǵan matchtyń alǵashqy 15 mınýtyn jap-jaqsy ótkizip, aıdyn ıelerin biraz ýaqyt óz aımaǵyna jaqyndatqan joq. Degenmen kezdesýdiń 16-mınýtynda jerlesterimizdiń qorǵanysy syr berip, «Sochı» hokkeıshileri gol soǵyp ketti. Artıom Nıkolaev Ortıo qorǵaǵan qaqpany dál kózdep, komandasyn alǵa shyǵarsa, arada eki mınýt ótkende Kırıll Melnıchenko mergendik tanytyp, esepti 2:0-ge jetkizdi.
Úzilisten keıin de aıdyn ıeleri belsendilik tanytyp, 23-mınýtta «Barys» qaqpasyna úshinshi shaıbalaryn saldy. Goldyń avtory – Aleksandr Gordın. Iýrıı Mıhaılıs shákirtteri osydan keıin ǵana es jııa bastady. 32-mınýtta Kıortıs Volk kózge tússe, 36-mınýtta Roman Starchenko esepti 3:2-ge deıin qysqartty. Alaıda sheshýshi kezeńde aıdyn ıeleri qaqpamyzǵa taǵy jaýapsyz eki shaıba soǵyp, iri eseppen jeńiske jetti. 45-mınýtta Djeı Sı Laıpon komandasynyń tórtinshi shaıbasyn salsa, 53-mınýtta Ivan Mıshenko oıynnyń núktesin qoıdy.
Bıylǵy maýsymda jeńisinen jeńilisi kóbeıip bara jatqan «Barystyń» jaǵdaıy ár match saıyn kúrdelene túsýde. Qazirgi kezde olar turaqty birinshiliktiń «Shyǵys» konferensııasyndaǵy jarys kestesinde 10-orynda tur. Jerlesterimiz kelesi kezdesýin búgin Máskeýde «Spartakpen» ótkizedi.
