Bul Qazaqstan Respýblıkasy men Qazaqstan Ulttyq Bankine qarsy Belgııadaǵy proseste Statıdiń eshqandaı perspektıvasy joq ekendiginiń belgisi.
Statımen salynǵan tyıymnyń alynýy Brıýssel Apellıasııalyq sotynyń 2021 jylǵy 16 qarashadaǵy sheshiminiń tikeleı nátıjesi. Bul sheshim Statıdiń iri kólemdegi alaıaqtyq shemaǵa qatysy bar jáne ol tek tórelik sotty ǵana emes, sonymen qatar tórelik sheshimniń kúshin joıý jónindegi prosess kezinde Shvesııa sottaryn da jańylystyrǵanyn anyqtady.
Statı Belgııadaǵy sot talqylaýyn 2017 jyldyń sońynda qozǵady. Bul 2018 jylǵy mamyrda Bank of New York Mellon saqtaýyndaǵy Ulttyq qorǵa tıesili 530 mıllıon AQSh dollaryna tyıym salynýyna ákep soqty.
Belgııadaǵy is júrgizý kelesi úsh prosesti qamtıdy: (i) tórelik sheshimdi taný jáne oryndaý boıynsha is júrgizý, (ii) ýaqytsha tyıym salý boıynsha is júrgizý jáne (iii) aktıvterge ýaqytsha tyıym salýdy atqarýshylyq is júrgizýge aýystyrý. Osy prosester Brıýsseldiń Apellıasııalyq sotymen Statı uıymdastyrǵan iri kólemdi alaıaqtyq nátıjesinde alynǵan tórelik sheshimge negizdelgen.
Búgingi jańalyqtarǵa qatysty Ádilet mınıstri Marat Beketaev túsinik berdi.
«Belgııadaǵy 530 mıllıon AQSh dollaryna tyıym salýdan Statıdiń óz erkimen bas tartýy - olardyń iri kólemdegi alaıaqtyq áreketteriniń saldarynyń biri ǵana. Statı men olardyń sybaılastarynyń, onyń ishinde Denıel Chapman men onyń Argentem Krık kompanııalarynyń alaıaqtyǵynan zańnyń ústemdigin qorǵaý jolynda Ádilet mınıstrligi qol jetimdi barlyq quraldardy qoldanatyn bolady. Bul quqyqtyq qorǵaý quraldary Respýblıkaǵa qarsy Statımen jalǵan jáne zańsyz qýdalaý naýqanyn júrgizip jatqan Belgııada jáne basqa da ıýrısdıksııalarda bar», dedi mınıstr.
«Sonymen qatar ýaqytsha tyıym salý prosesi aıasynda Londonnyń Joǵarǵy sotynda bólek sot prosesi bolǵanyn qosymsha habarlaımyz. Onyń nátıjesinde 2020 jylǵy naýryzda Respýblıka men Ulttyq Bank paıdasyna sheshim qabyldandy. Osy Londondaǵy proseste Joǵarǵy sottyń 2021 jylǵy aqpandaǵy Respýblıka men Ulttyq Banktiń 3,7 mıllıon dollar kólemindegi sot shyǵyndaryn tóleýge mindetteıtin sheshim Statıdiń jeńilisiniń nátıjesi boldy. Alaıda, Statı sheshimdi osy ýaqytqa deıin oryndamady», delingen vedomstvo málimetinde.
.
