Áńgime barysynda Qazaqstan men DDSU arasyndaǵy yqpaldastyqtyń ózekti máseleleri men perspektıvalary talqylandy. Memleket basshysy Bas dırektorǵa elimizdiń pandemııaǵa qarsy is-qımyldar jóninde qabyldap jatqan sharalary, onyń ishinde qazaqstandyq ǵalymdardyń koronavırýsqa qarsy ázirlegen preparattary men halyqqa jappaı vaksına salý jumystarynyń júrgizilý barysy týraly málimet berdi.
Qasym-Jomart Toqaev Tedros Andhanom Gebreıesýspen buǵan deıingi kezdesýlerin eske ala otyryp, Dúnıejúzilik densaýlyq saqtaý uıymy Qazaqstannyń senimdi áriptesi ekenin atap ótti.
«Biz Sizdiń Dúnıejúzilik densaýlyq saqtaý uıymyn damytýǵa qosqan úlesińizdi joǵary baǵalaımyz. О́kinishke qaraı, álem kúrdeli kezeńdi bastan keshirip jatyr. Qazir koronavırýstiń jańa shtammy — «Omıkron» anyqtaldy. Biz indetpen kúreste árdaıym birge bolýymyz kerek», dedi Prezıdent.
Qasym-Jomart Toqaev Tedros Adhanom Gebreıesýske ekinshi jańa QazCoVac-P vaksınasy týraly aıtty. Atalǵan preparat klınıkalyq zertteýler fazasyna kandıdat vaksınalar tizimine engizildi. Prezıdent qazaqstandyq vaksınaǵa qoldaý kórsetkeni úshin DDSU basshysyna alǵys aıtty.
Memleket basshysy DDSU-nyń vaksınaǵa teń quqyqty jáne ádil qoljetimdilikti qamtamasyz etýge umtylysyn tolyq qoldaıtynyn atap ótip, qazaqstandyq vaksınany muqtaj elderdiń bárine usynýǵa daıyn ekenin aıtty.
Kezdesýde halyqtyń densaýlyǵyn jaqsartý úshin halyqaralyq kúsh-jigerdi jumyldyrý qajet ekeni aıtyldy. Osy rette Memleket basshysy densaýlyq saqtaý júıesindegi eki mańyzdy – alǵashqy medısınalyq-sanıtarlyq kómek pen densaýlyq saqtaý salasynda kórsetiletin qyzmetpen halyqty jappaı qamtý baǵyttaryn biriktirý týraly usynysyn jetkizdi.
Tedros Andhanom Gebreıesýs Qasym-Jomart Toqaevtyń DDSU-nyń maqsattary men is-qımyldaryna, sonyń ishinde alǵashqy medısınalyq-sanıtarlyq kómekti damytýǵa baılanysty bastamalaryna beıildiligi úshin qoldaý bildirdi.
Uıymnyń Bas dırektory óz kezeginde Qasym-Jomart Toqaevqa koronavırýsqa qarsy kúres jóninde qabyldanyp jatqan sharalar, vırýstyń jańa shtamdary jáne pandemııanyń odan ári órshý ssenarıine qatysty boljamdar týraly málimet berdi. Tedros Andhanom Gebreıesýs osy ólimge soqtyratyn asa qaýipti indetpen kúreste vaksına salýdyń asa mańyzdy ekenin atap ótti.
