Qazaqstan • 06 Jeltoqsan, 2021

Senatta asharshylyq týraly qujattardyń kezekti jınaǵy tanystyryldy

55 ret kórsetildi

Senat Tóraǵasy Máýlen Áshimbaevtyń qatysýymen «Asharshylyq. Golod. 1928-1934. Dokýmentalnaıa hronıka» jınaǵynyń IV-Vtomdary kópshilikke tanystyryldy, dep jazady Egemen.kz.

Eńbektiń alǵashqy úsh tomy da Senattyń uıytqy bolýymen bıylǵy mamyr aıynda Saıası qýǵyn-súrgin jáne asharshylyq qurbandaryn eske alý kúni qarsańynda jaryq kórgen edi.

Is-shara barysynda Máýlen Áshimbaev Táýelsizdiktiń 30 jyldyǵy qarsańynda mundaı eńbek basylyp shyǵýynyń mańyzy zor ekenine nazar aýdardy. Ol óz sózinde egemendik alǵaly elimiz tarıhymyzdy taný jolynda tolaıym tabysqa qol jetkizgenin atap ótti.

«Biz Táýelsizdigimizdiń 30 jyldyq tarıhı mejesin aıtýly jetistiktermen qarsy alyp otyrmyz. Osy aralyqta tarıhymyzdy taný, rýhanııatymyzdy dáripteý jáne ulttyq qundylyqtarymyzdyń órisin keńeıtý jolynda aýqymdy jumys atqaryldy», dedi Senat Tóraǵasy.

Máýlen Áshimbaev bul jumystarǵa otandyq ǵalymdar men tarıhshylar úlken úles qosqanyn tilge tıek etti. Sondaı-aq ol Memleket basshysy ult tarıhynyń júıeli túrde zerttelýine basa mán berip otyrǵanyn aıtty.

«Prezıdentimiz Qasym-Jomart Toqaev «Táýelsizdik bárinen qymbat» atty maqalasynda zobalań jyldardy jan-jaqty zertteý, Asharshylyq qurbandarynyń sanyn naqtylaý, tarıhı qujattardy jınaqtap, olardy muqııat zerdeleý kerektigin aıtqan edi. Osyǵan oraı Senat ǵalymdarmen birlesip, bul baǵytta biraz jumys atqardy. Bıyl mamyr aıynda «Asharshylyq. Golod. 1928-1934. Dokýmentalnaıa hronıka» atty qujattar jınaǵynyń úsh tomy jaryq kórdi. Onda Asharshylyqqa qatysty biregeı tarıhı qujattar men derekter, náýbettiń sebebi men saldary týraly arhıv materıaldary jınaqtalǵan», dedi Máýlen Áshimbaev.

Búgin kópshilikke jol tartqan jańa eki tom da asharshylyq týraly tarıhı qujattardy jınaý jumystarynyń jalǵasy. Eńbektiń 4-tomynda qazaq aýyldaryn kúshtep ujymdastyrý, tárkileý saıasatyna qatysty halyqtyń narazylyǵyn bildiretin mańyzdy materıaldar jınaqtalǵan. Al, 5-tomda kýágerlerdiń estelikteri qamtyldy. Bul tomnyń negizin asharshylyqtyń zardabyn tartqan aqyn-jazýshylar, ǵalymdar, qoǵam qaıratkerleriniń bastan keshken oqıǵalary quraıdy.

Sonymen qatar Senat Tóraǵasy estelikter men jazbalardy qysqa ýaqytta jınaqtap, toptastyryp, kópshilikke usynǵan redaksııalyq alqa ujymyna jáne Parlament depýtaty Berik Ábdiǵalı bastaǵan qurastyrýshylarǵa, eńbektiń basylyp shyǵýyna qoldaý kórsetken Mádenıet jáne sport mınıstrliginiń basshylyǵyna alǵys bildirdi.

«Asharshylyq taqyrybyn zertteý táýelsiz tarıhı sana qalyptastyrý úshin qajet. Al ortaq tarıhı tanym birtutas ulttyq sana qalyptastyrýǵa qyzmet etedi. Munyń bári táýelsizdigimizdi kúsheıtetin mańyzdy faktorlar ekeni sózsiz. Sondyqtan elimizdiń basyna túsken alapat qasiretti tereń túsinýge múmkindik beretin osy bestomdyq táýelsizdigimizdi nyǵaıtýǵa óz úlesin qosady jáne osy taqyrypty zerttep júrgen tarıhshy ǵalymdardyń jumysyna tyń serpin beredi dep úmittenemiz»,  dedi Máýlen Áshimbaev.

Is-sharaǵa zııaly qaýym ókilderi jáne jınaqtyń daıyndalýyna atsalysqan belgili tarıhshy ǵalymdar qatysty. Olar óz sózderinde ultymyzdyń basynan ótken qasiretti jyldardyń zardabyn tereń zerttep, bilý úshin osyndaı irgeli eńbektiń mańyzy zor ekenin aıtty. Sondaı-aq tarıhshylar aldaǵy ýaqytta da bul baǵyttaǵy zertteý jumystary jalǵasa beretinine senim bildirdi.

Sońǵy jańalyqtar

Esińde bolar ár kúniń

Qazaqstan • Keshe

Jemqorlyq statıstıkasy

Qazaqstan • Keshe

«Bir belgi úshin...»

Kıno • Keshe

Shynaıylyq

О́ner • Keshe

Balalyq shaqtyń aspany

Qoǵam • Keshe

Uqsas jańalyqtar