«Qadirmendilerim, Atyraýdaǵy mıssııamyzdy ázirge osy jerden qaıyrýdyń reti kep tur. «Qazaqstan» teleradıokorporasııasy» AQ Atyraý oblystyq fılıalynyń basshysy qyzmetimizdi eńbek demalysymen doǵardyq. Qyzmetten bosatý týraly óz erkimizben jazǵan ótinishimizge túsinistik tanytyp, sheshimimizdi qoldaǵan jáne osy qyzmetke laıyq kórgen korporasııa basshysy, myqty medıa menedjer, teleustahanadaǵy ustazymyz Lázzat Muratqyzyna zor alǵysymdy bildiremin. Otbasy jaǵdaıymen elordamyzǵa qyzmet aýystyrǵan jaıymyz bar.
Atyraýda azdy-kópti 2 jyl 7 aıǵa jýyq qyzmet qylyp, mol kásibı tájirıbe jınadyq. Tapsyrylǵan qyzmetti eń aldymen uly amanat dep bildik. Amanatqa qııanat jasamaý - basty ustanym boldy. Teleradıomyzda atqarylǵan istiń bárin áleýmettik jelidegi jurtshylyqpen udaıy bólisip otyrdyq. Ony qaıtalap jatýdy jón kórmedim. Teleradıo isiniń komandalyq jumys ekenin árkim biledi. Barsha jetistikke aýyzbirligi jarasqan ujymymyzben birge qol jetkizdik. Biz deıtinim de sondyqtan.
О́z basym úshin ǵumyr-paraǵymnyń Atyraý úzigi betburysty kezeń boldy. Atyraý - baǵymdy eseleı túsken qutty óńir. Tamyrymdy tereń jaıyp, Atyraýda qyzym-qyzǵaldaǵym dúnıe dıdaryn ashty. Ulym elimizdegi eń degdar oqý orny - Atyraýdaǵy Nazarbaev Zııatkerlik Mektebine oqýǵa tústi. Jaıyqtaǵy jurtpen etene aralasyp, el aǵalarynyń batasyna keneldik. El kórip, jer tanydyq.
Atyraýda «Mádenıet salasynyń úzdigi», oblystyq máslıhattyń «Atyraý oblysynyń áleýmettik-ekonomıkalyq damýyna qosqan úlesi úshin» tósbelgilerimen, óńir basshysy Mahambet Joldasqalıulynyń Alǵys hatymen marapattaldyq. Qyzmet etken ýaqytymyzda Atyraý oblysyn basqarǵan Nurlan Asqaruly men qazirgi ákim Mahambet Joldasqalıulynyń zor qoldaýyna ıe boldyq. Nar tulǵaly el azamatynyń ekeýine de inilik sheksiz alǵysymdy bildirgim keledi.
Atyraýda «óńirdi kórgeniń - ómirdi kórgeniń» degenniń aqıqatyna qanyqtyq. Mereıimizdi tasytyp, mártebemizdi ósirgen, abyroıymyzdy asyryp, kókke kótergen Atyraý halqyna basymyzdy ıip, alǵys aıtamyn. Múlde tanymaıtyn jerge baryp sonsha ýaqyt qyzmet qylý halyq qoldamasa múmkin emes-aý bilem. Sol qurmet-qolpashyńyzǵa laıym laıyq bolsaq deımiz. Sımaı emes, qımaı ketip baramyz», dep jazba qaldyrdy ol.
