«Astana qalasy ákimdiginiń laýazymdy tulǵalaryna jáne LRT, BRT/ITS jobalaryn iske asyrýǵa bólingen aqsha qarajatyn jymqyrý faktileri boıynsha ózge de tulǵalarǵa qatysty qylmystyq is aıasynda T. Ardanǵa jáne Q. Sultanbekovke «qyzyl bıýlleten» boıynsha (qamaýǵa alý jáne ekstradısııalaý maqsatynda) halyqaralyq izdeý jarııalandy.
Júrgizilgen is-sharalar T. Ardannyń Túrkııada ornalasqandyǵyn anyqtady. Sot ony qamaýǵa alý úshin syrttaı sanksııa berdi. Osy memlekettiń quqyq qorǵaý organdary onyń ornalasqan jerin anyqtaý jáne ustaý boıynsha is-sharalar júrgizýde. Sonymen qatar Q. Sultanbekovtiń AQSh aýmaǵynda ekendigi anyqtaldy. Ony ustaý jáne ekstradısııalaý týraly ótinishter birneshe ret joldandy. Alaıda, AQSh zańy boıynsha eger ol kóshi-qon rejımin buzbasa, «qyzyl bıýlletenniń» bolýy izdeýde júrgen adamdy ustaýǵa negiz bolmaıdy. Sonymen qatar bizdiń azamatty ekstradısııalaý qylmyskerlerdi ustap berý týraly ekijaqty kelisimniń bolmaýymen qıyndap otyr. Bul máseleni ýákiletti organ pysyqtaıdy», delingen agenttik habarlamasynda.
Sondaı-aq málim etilgendeı, Interpol saıtynda tek kisi óltirý, terrorızm, ekstremızm syndy qylmystar úshin aıyptalýshylardyń málimetteri engiziledi.
Halyqaralyq qylmystyq polısııa uıymy – Interpoldyń talaptary men erejelerine sáıkes, Interpoldyń jarııa veb-saıtynda qylmyskerdi izdestirý jáne jarııalaý týraly málimetter tek úlken qoǵamdyq rezonans týdyrǵan, sondaı-aq qoǵamǵa joǵary qaýip tóndiretin (kisi óltirý, terrorızm, ekstremızm jáne t.b.) qylmys jasaǵan adamdarǵa qatysty jarııalanatynyn atap ótken jón.
Dál osy talaptar izdestiriletin adamdardy bárine qol jetimdi tizimge qosýǵa negiz bolady. Jarııa veb-saıtta málimetterdi jarııalaý týraly túpkilikti sheshimdi Interpoldyń Bas hatshylyǵy (Lıon, Fransııa) qabyldaıdy.
