Munda Egemen eldiń Eltańbasyn jasaǵan avtor Jandarbek Málibekulyndaı taý Tulǵanyń ómir joly men shyǵarmashylyǵy, tyń týyndylarynyń túpnusqa jobalary, qoljazbalary men súbeli suhbattary, jarııalanǵan eńbekteri, foto-beıne materıaldary sekildi barlyq qujattary Táýelsizdiktiń 30 jyldyǵy, Ulttyq arhıvtiń 15 jyldyǵy qarsańynda saqtaýǵa alyndy.
Saltanatty sharaǵa memleket qaıratkeri, qujattanýshy Jaqypov Mirbolat Habıuly, fılologııa ǵylymdarynyń doktory, professor Serik Negımov, jazýshy, dramatýrg, jýrnalıst, tarıhshy, fılolog-ǵalym Joltaı Jumat-Álmashuly, saıası ǵylymdarynyń doktory, professor Ábdijálel Qoshqaruly, Qazaq Ulttyq óner ýnıversıtetiniń professory Baıqońyr Ijanuly, Qoljazbalar jáne sırek kitaptar ulttyq ortalyǵynyń basshysy Jandos Boldyqov syndy belgili tulǵalar qatysty.
Qazaqstan Respýblıkasy Ulttyq arhıviniń dırektory Saǵıla Esimseıitqyzy Ulttyq arhıvtiń jeke tektik qoryna qabyldanǵan Jandarbek Málibekulynyń qundy qujattary men qoljazba-syzbalarynyń qanshalyqty mańyzdy ekenin aıta kelip, Eltańba avtorynyń úlgi bolarlyq bastamasyna alǵysyn bildirdi.
«Memleketimizdiń Eltańbasynyń avtory retinde ǵana emes, kóptegen elderdegi sáýletti ǵımarattardyń arhıtektory retinde, qazaq halqynyń san ǵasyrlyq sáýlet ónerin boıyna sińirgen dara tulǵa retindegi sizdiń qundy jazbalaryńyz ben eskızderińiz Ulttyq arhıv qorynda keleshek urpaqqa amanat retinde saqtalatyn bolady», dedi S. Esimseıitqyzy.
Jandarbek Málibekuly Ulttyq arhıv ujymyna alǵysyn bildirip, kóziniń qarashyǵyndaı saqtap kelgen dúnıesin keleshek urpaqqa jetkizer degen úlken senimmen tabystap otyrǵanyn aıtty.
«Erteńgi tarıhty saqtaıtyn arhıv. Sondyqtan el aǵalary erteńgi urpaqqa úlgi bolatyndaı qundy dúnıelerin arhıv qoımalaryna tabys etýdi qolǵa alý kerek», dedi.
Sonymen qatar Ulttyq arhıvtiń dırektory Saǵıla Nurlanovaǵa alǵys retinde óz jobasymen quıylyp ázirlengen, Eltańba pishinindegi áshekeı boıtumardy syılady.
Máńgilik eldiń qorjynynda máńgilikke saqtaýǵa alynǵan bul altyn qor bolashaq urpaqtyń otansúıgishtigi men ultjandylyǵyn oıatatyn, mańdaıynda jarqyraǵan aıbyny bolyp turǵan Eltańbanyń qalaı barlyqqa kelip, ult rýhyn kóterý men álem aldyndaǵy abyroıyn asqaqtatyp turǵandyǵyn zerttep, sezinip jáne maqtan tutýyna buıyrǵan teńdesi joq sybaǵa dep bilemiz.
