Ortalyq Azııadaǵy eń iri týrıstik keshen sanalatyn «Kerýen Saraıdyń» jalpy aýmaǵy 20,5 gektar jerdi alyp jatyr. Munda adam janyna kerektiniń bári de bar. Zamanaýı dúkender men oıyn-saýyq ortalyqtary, orta ǵasyr stılindegi saraılar men «ushatyn teatr» kózdiń jaýyn alady. Keshenniń marketology Belasar Esenbektiń aıtýynsha, «Kerýen Saraı» kádýilgi kilt pishininde soǵylǵan. Tóbesinen qarasańyz tap solaı. Kilttiń ushy (keshennen shyǵyp ketetin tusy) Qoja Ahmet Iаsaýı mavzoleıine baryp tireledi. Iаǵnı, týrıst saraımen tolyq tanysyp bolǵan kezde tarıhymyz týraly bilim jıyp, Iаsaýı babamyzdyń kim bolǵanynan jetkilikti maǵlumat alady. Sóıtip, ári qaraı mavzoleıdi aralaýǵa rýhanı turǵydan daıyn bolady.
«Keshenniń kire berisinde jáne shyǵa berisinde besjuldyzdy qonaqúı ornalasqan. Jalpy, keshenniń konsepsııasy mynadaı: adam qydyryp kelip, qonaqúıge ornalasady, odan keıin sý ústindegi shoýdy kóredi, ol jerde «Qyz Jibek – Tólegen» fontan shoýy qoıylady. Odan shyǵyp attar shoýyn kórý úshin amfıteatrǵa barady. Odan bólek túrli konsertter bar. Saýda jasaımyn degenderge de erekshe jaǵdaı jasalǵan. «Ushatyn teatr» da adamǵa buryn-sońdy sezinbegen áser syılaıdy. Bárin aıaqtaǵan soń meıramhanaǵa nemese fýd-kortqa baryp tamaqtana alady. «Kerýen Saraı» kesheniniń ereksheligi – eski tarıhymyzdy jańa zamanaýı tehnologııalarmen úılestire otyryp halyqqa jańa formatta kórsetedi», - deıdi ol.
Altyn Samuryk «ushatyn teatrynyń» ǵajabyn sózben sıpattap jetkizý tipti qıyn. Keshen uıymdastyrýshylary bul jobany 8D sońǵy tehnologııasymen jaraqtalǵan Ortalyq Azııadaǵy biregeı teatr dep baǵalaıdy. Arnaıy kresloǵa otyrǵan soń-aq altyn samuryq sizdi kóne tarıh tereńine tartyp áketedi. Baıyrǵy tarıhı shaharlardy aralatyp, odan zamanaýı Nur-Sultan shaharynyń tóbesimen ushyryp, sońynda túrik dúnıesiniń temirqazyǵyna aınalǵan Túrkistan qalasyna qaıtyp alyp keledi.
Keshendegi shoýlardy uıymdastyrý jáne damytý boıynsha jetekshi Alekseı Hramenkovtyń aıtýynsha, attar shoýy qoıylatyn «Arena» saraıy 1500 orynǵa laıyqtalyp salynǵan.
Qazaqstandaǵy eń úlken LED ekran da osy jerde qoıylǵan. Attar jattyǵýdy osy keshen ishinde jasaıdy. Barlyǵy da shetelden aldyrylǵan janýarlar. Atqoradaǵy at sany – 18. Attar qoıylymynyń jobasyn fransııalyq kaskader jáne bapker Marıo Lıýrashı jasap bergen. Qazir Nomad kaskaderler toby aınalysady.
Kóz tartar keshen qurylysyna «Qazaqstannyń Damý Banki» AQ qoldaý kórsetken. Joba quny – 87 mlrd teńge.
«Sonyń ishinde ınvestorlardyń jeke qarjysy 47 mlrd teńgeni quraıdy. Qazaqstannyń Damý Banki 40 mlrd teńge kóleminde qarjy quıdy. Joba 115 bólmeli eki qonaqúı, oıyn-saýyq ortalyǵyn salýdy qamtydy. Qazirgi ýaqytta joba sátti jumys isteýde», - deıdi Damý Bankiniń Klıenttermen jumys jónindegi dıreksııanyń aǵa bankıri Serik Ahmetov.
Týrısterge qolaıly bolý úshin keshen aýmaǵynda birneshe elektrokar jumys isteıdi. Ázirge «Kerýen Saraı» keshenin tolyqqandy kommersııalyq joba dep ataý qıyn. Dese de Alekseı Hramenkov jobanyń tartymdylyǵyn arttyrý úshin josparymyz kóp deıdi. О́ıtkeni Túrkistandaǵy áýlıe-ámbıelerdiń basyna táý etý úshin keletin adam sany birshama. Endi solardy týrıstik nysandar men jobalarǵa sátti tarta bilý qajet. Qazir qys maýsymy bolǵandyqtan kelýshilerdiń qarasy qalyń emes. Al bıyl jaz kezinde sýdaǵy shoýdy kórýdiń ózine saǵatyna 13 myń adam jıylǵan.
«Statıstıka boıynsha negizinen bizge Qyzylorda, Shymkent, Almaty qalalarynan jáne Túrkistan oblysynyń ózinen adamdar kóp keledi. Sheteldik týrıster – negizinen Túrkııa, Fransııa jáne basqa da Eýropa elderinen kelýshiler. Qazaqtyń salt-dástúrine qyzyǵýshylyq tanytqan qytaılyq týrıster de kóp boldy. Sheteldik týrıster úshin biz úsh tilde (qazaq, orys, aǵylshyn) erkin sóıleı alatyn gıdterdi de daıyndap qoıdyq. Túrik tilinde erkin sóılesetin qyzmetkerlerimiz de bar. Maýsymnyń qyzǵan kezinde kúnine 20 myńǵa deıin adam keldi», - deıdi Belasar Esenbek.
Keshen týrıster úshin tynyǵyp, demalyp, kóńil kóteretin meken bolsa, kásipkerler úshin – tabystyń kózi. Ásirese, jaz maýsymy kezinde bul jerde kúnine myń dollardan asyryp saýda jasaýǵa bolady. Belasar Esenbektiń aıtýynsha, keshen ishinde ashyq jáne jabyq bazarlar uıymdastyrylǵan. Ol jerde ár apta saıyn ár aýdannyń kásipkerleri kelip, óz ónimderi men taýarlaryn satylymǵa shyǵara alady. Ári bul úshin olardan bir tıyn aqy alynbaıdy.
Týrıstik ortalyq aýmaǵyn aralaı júrip álemdik brendterdiń saýda jelilerine bas suǵyp, ulttyq taǵamdar ázirlenetin meıramhanalardan as ishýge de bolady. Naýryz aıynan bastap esten ketpes áserli shoýlar qaıta bastalmaq. Oıyn-saýyq jobalarynyń barlyǵy derlik kelýshilerdiń ejelgi tarıhpen, babalar jolymen, qazaqtyń qasıetti salt-dástúrimen tanystyrý maqsatynda jasalǵan.
