Qazaqstan pavılonyn kórýge kelgen 500 myńynshy qonaq BAÁ Ulttyq keńesiniń BAQ boıynsha jýrnalısi Mansýr Lardı bolyp shyqty. Mereıtoılyq qonaqty Qazaqstan Respýblıkasynyń Birikken Arab Ámirlikterindegi Tótenshe jáne О́kiletti Elshisi Madııar Meńilbekov myrza qarsy aldy.
«Biz Qazaqstan pavılonynyń 500 000-shy kelýshisin qýana qarsy aldyq! Bizdiń pavılon kórmeniń eń tanymal 10 pavılonynyń qataryna kiredi. Bizdiń pavılonymyz, ıaǵnı bizdiń elimiz halyqaralyq aýdıtorııanyń úlken qyzyǵýshylyǵyn týdyryp otyrǵanyna óte qýanyshtymyz», dep Elshi qýanyshyn bildirdi.
Mansýr Lardıge Qazaqstandy óz kózimen kórip, elimizdiń mádenıetimen jaqynyraq tanysýǵa múmkindik berildi. Atap aıtqanda, oǵan syılyq retinde eki adamǵa arnalǵan týrıstik sapar tabys etildi. Saıahat demeýshileri - «Kazakh Tourism» Ulttyq kompanııasy, qazaqstandyq Air Astana áýe kompanııasy, Shymbulaq taý kýrorty jáne ML Tour týroperatory.
Eske sala ketsek, Dúnıejúzilik EXPO-2020 kórmesi 2021 jyldyń 1 qazanynda Dýbaı qalasynda ashyldy. Osy ýaqyt ishinde Qazaqstan pavılony úlken tanymaldylyqqa ıe boldy. EXPO-2020 Dubai uıymdastyrý komıtetiniń derekteri boıynsha kórmege 5 mıllıonnan astam adam kelgen. Kún saıyn ulttyq pavılonǵa ortasha eseppen 8 myń adam keledi. Týrıstik qyzyǵýshylyqtan basqa, ol halyqaralyq bıznes toptary arasynda joǵary iskerlik qyzyǵýshylyqqa ıe. QR Ulttyq pavılonynyń alańynda 30-ǵa jýyq iskerlik is-shara josparlanǵan, onyń aıasynda konferensııalar, forýmdar, B2B kezdesýler ótedi, sondaı-aq eldiń ınvestısııalyq jáne týrıstik áleýeti boıynsha jobalar, ǵylymı jáne bilim berý bastamalary usynylady.
Ulttyq pavılonnyń kontenti kórmeniń «Aqyl-oıdy biriktirip, bolashaqty qurý» taqyrybyn tolyq ashady, al onyń mazmuny respýblıkanyń týrıstik jáne ınvestısııalyq áleýetin ashady.
Budan basqa, kún saıyn kelýshilerge arnalǵan pavılonnyń aldynda arnaıy jabdyqtalǵan ashyq alańda etnıkalyq mýzykalyq ujym óner kórsetýdi. Sondaı-aq pavılon aýmaǵynda ornalasqan ulttyq taǵamdar meıramhanasy da kelýshilerdi tánti etti.
