– Táýelsizdik jyldarynda oblysta 3 900 shaqyrym gaz, 2,5 myń shaqyrym aýyz sý jelisi tartyldy. Ortalyqtandyrylǵan sýmen qamtý kórsetkishi 35-ten 99 paıyzǵa deıin artty. Sondaı-aq 30 jylda 12 mln sharshy metr turǵyn úı paıdalanýǵa berildi. Turǵyn úı qurylysyn jandandyrýǵa 640 mlrd teńgeden astam ınvestısııa salyndy, – deıdi M.Dosmuhambetov.
Turǵyn úı qurylysy aýdandarda da qarqyn alyp otyr. Qurmanǵazy aýdanynyń ákimi Marat Mýrzıevtiń aıtýynsha, buǵan deıin eki kópqabatty turǵyn úı boı kóterip, muqtaj otbasylar baspanamen qamtylypty. Al el Táýelsizdiginiń 30 jyldyǵy qarsańynda «Dekor» JShS Qadyr eldi mekeninde turǵyzǵan 60 páterlik úsh qabatty turǵyn úı paıdalanýǵa tapsyryldy.
– Elimizde turǵyndardyń áleýmettik-turmystyq máseleleri oń sheshimin taýyp keledi. Sonyń biri – baspanaǵa muqtajdyq. Qazir turǵyndar úshin baspanaly bolýdyń múmkindigi kóbeıdi. Aýdandarda «Nurly jer» baǵdarlamasymen turǵyn úı keshenderi salynyp, el ıgiligine berilip jatyr. Kóptegen otbasy qonys toıyn toılap, qýanyshqa keneldi. Memlekettiń qoldaýymen myńdaǵan otbasy jańa baspanaǵa qonystandy, – deıdi M.Mýrzıev.
Aýdan ákiminiń túsindirýinshe, jańa turǵyn úıdiń páterleri 3 sanatqa kiretin turǵyndarǵa bólinedi. Aldymen kópbalaly otbasylar úsh bólmeli páterge ıelik etedi. Sondaı-aq múmkindigi shekteýli jandarǵa tómengi qabattan baspana berý kózdelipti.
Al Mahambet aýdanynda Nur Otan partııasynyń saılaýaldy baǵdarlamasyn oryndaý maqsatynda kópbalaly úsh otbasyǵa, sondaı-aq jetim jáne ata-anasynyń qamqorlyǵynsyz qalǵan jasóspirimderge, zeınetkerlerge, tolyq emes otbasylarǵa jańa baspananyń kilti berildi. Is-sharaǵa oblys ákiminiń orynbasary Qaırat Bekenov qatysyp, baspanaly bolǵandardyń qýanyshyn bólisti.
– Bizdiń oblysta arnaıy baǵdarlamalar aıasynda túrli jobalar iske asyrylyp jatyr. Máselen, bıyl Mahambet aýdanynda birneshe jobany júzege asyrý úshin 4 mlrd teńgeden astam qarjy bólindi. Onyń ishinde aýyldarǵa jol, sport nysandaryn salý, ınjenerlik ınfraqurylymdardy, memlekettik baǵdarlama sheńberinde az qamtylǵan otbasylardy turǵyn úımen qamtý sekildi jobalar bar, – dedi Q.Bekenov.
Bul aýdanda eki páterlik turǵyn úıge Eleonora Aıýsına men Móldir Aımaǵambettiń otbasylary kóship keldi. Jańa páterler kógildir otynǵa qosylǵan. Elektr energııasy men sý jelileri tartylǵan.
Atyraý oblysy
